નવી દિલ્હી, 20 નવેમ્બર (હિ.સ.) ભારતીય ક્રિકેટ ટીમના કેપ્ટન રોહિત શર્મા, કરિશ્માઈ બેટ્સમેન વિરાટ કોહલી, વિકેટકીપર-બેટ્સમેન કેએલ રાહુલ, સ્પિન ઓલરાઉન્ડર રવિન્દ્ર જાડેજા, ફાસ્ટ બોલર જસપ્રિત બુમરાહ અને મોહમ્મદ શમીને, 2023ની પુરુષ વન ડે વર્લ્ડ કપ ટીમમાં સામેલ કરવામાં આવ્યા છે.
જો કે ભારત ટુર્નામેન્ટમાં રનર્સ-અપ બન્યું હતું, પરંતુ અમદાવાદમાં ફાઇનલમાં ઓસ્ટ્રેલિયા સામે છ વિકેટથી પરાજય સાથે તેમની દસ મેચની અજેય જીતની સિલસિલો સમાપ્ત થઈ હતી. ટીમના છ ખેલાડીઓએ ટૂર્નામેન્ટની સર્વશ્રેષ્ઠ ટીમમાં સ્થાન મેળવ્યું હતું. જેમાં લીડિંગ રન-સ્કોરર અને પ્લેયર ઓફ ધ ટુર્નામેન્ટ કોહલી તેમજ અગ્રણી વિકેટ લેનાર શમીનો સમાવેશ થાય છે.
50 ઓવરના વર્લ્ડ કપમાં સતત બીજી વખત ટીમ ઓફ ધ ટૂર્નામેન્ટમાં સ્થાન મેળવનાર રોહિતે ભારત માટે ટોચના ક્રમમાં મહત્ત્વની ભૂમિકા ભજવી હતી. ચેન્નાઈમાં ઓસ્ટ્રેલિયા સામે શૂન્ય પર આઉટ થયા બાદ શર્માએ, અફઘાનિસ્તાન સામે માત્ર 84 બોલમાં 131 રન ફટકારીને પ્લેયર ઓફ ધ મેચનો એવોર્ડ જીત્યો હતો.
તેણે કટ્ટર હરીફ પાકિસ્તાન સામે, નિર્ણાયક જીતમાં 86 રનની શાનદાર ઈનિંગ રમી અને ત્યારબાદ ઓસ્ટ્રેલિયા સામેની ફાઈનલ સહિત એક પ્રસંગ સિવાય તમામમાં 40નો આંકડો પાર કર્યો.
જ્યારે કોહલીએ વર્લ્ડ કપ 2023માં 95.62ની એવરેજથી 765 રન બનાવ્યા હતા, તેણે સચિન તેંડુલકરના અગાઉના રેકોર્ડને તોડ્યો હતો. જેણે 2003ની આવૃત્તિ દરમિયાન 673 રન બનાવ્યા હતા. કોહલીનું સર્વશ્રેષ્ઠ પ્રદર્શન ન્યૂઝીલેન્ડ સામેની સેમિફાઇનલ જીતમાં આવ્યું, જ્યારે તેણે 117 રનની શાનદાર ઇનિંગ રમીને ટૂર્નામેન્ટની તેની ત્રીજી સદી ફટકારી. આ તેની 50મી વન ડે સદી હતી. તેણે આ મામલે, મહાન સચિન તેંડુલકરને પાછળ રાખીને 12 વર્ષમાં પ્રથમ વખત ભારતને ફાઇનલમાં પહોંચાડ્યું.
કેએલ રાહુલે સમગ્ર ટૂર્નામેન્ટ દરમિયાન, ઘણી મહત્વની ઈનિંગ્સ રમી. જેમ કે ચેન્નાઈમાં અણનમ 97 રન તેમજ બેંગલુરુમાં તેમના હોમ ગ્રાઉન્ડ પર નેધરલેન્ડ સામેની નિયમિત જીતમાં સદી. તેણે ફાઇનલમાં ભારત માટે સૌથી વધુ 66 રનનો સ્કોર પણ બનાવ્યો હતો.
જાડેજા એ બોલથી પ્રભાવિત કર્યા, ખાસ કરીને દક્ષિણ આફ્રિકા સામે જ્યારે તે યુવરાજ સિંહ પછી વનડે વર્લ્ડ કપમાં, પાંચ વિકેટ ઝડપનાર બીજો ભારતીય સ્પિનર બન્યો. તેણે ત્રણ દિવસ પછી નેધરલેન્ડ સામે બે વિકેટ લઈને બીજો ઈતિહાસ રચ્યો કારણ કે, તેણે વર્લ્ડ કપમાં ભારતીય સ્પિનર દ્વારા સૌથી વધુ વિકેટ લેવા માટે હરભજન સિંહ અને અનિલ કુંબલેને પાછળ છોડી દીધા.
ઝડપી બોલર મોહમ્મદ શમીને, ભારતની પ્લેઈંગ ઈલેવનમાં મોડેથી સામેલ કરવામાં આવ્યો હતો, પરંતુ ત્યારથી તેણે મોટી અસર કરી છે. તે વર્લ્ડ કપમાં 24 વિકેટ સાથે સૌથી વધુ વિકેટ લેનાર બોલર હતો. તેણે ન્યુઝીલેન્ડ સામેની સેમીફાઈનલમાં સાત વિકેટ લઈને, ભારતની જીતમાં મહત્વની ભૂમિકા ભજવી હતી.
રોહિતની જેમ બુમરાહને પણ, વર્લ્ડ કપમાં સતત બીજી વખત 20 વિકેટ ઝડપીને ટીમ ઓફ ધ ટૂર્નામેન્ટમાં સામેલ કરવામાં આવ્યો છે. નવા બોલથી ખતરો ઉભો કરનાર બુમરાહે, ટાઈટલ મેચમાં ભારત માટે ઓસ્ટ્રેલિયાના મિચેલ માર્શ અને સ્ટીવન સ્મિથની શરૂઆતની વિકેટ લીધી હતી.
ટુર્નામેન્ટની ટીમના અન્ય ખેલાડીઓમાં, ઓલરાઉન્ડર ગ્લેન મેક્સવેલ અને લેગ-સ્પિનર એડમ ઝમ્પાનો સમાવેશ થાય છે. જેમણે રવિવારે ઓસ્ટ્રેલિયાના છઠ્ઠા વિશ્વ કપ ખિતાબમાં મુખ્ય ભૂમિકા ભજવી હતી.
2023 મેન્સ વનડે વર્લ્ડ કપ ટુર્નામેન્ટ માટેની ટીમ આ પ્રમાણે છે: ક્વિન્ટન ડી કોક (વિકેટ કીપર), રોહિત શર્મા (કેપ્ટન), વિરાટ કોહલી, ડેરીલ મિશેલ, કેએલ રાહુલ, ગ્લેન મેક્સવેલ, રવિન્દ્ર જાડેજા, જસપ્રિત બુમરાહ, દિલશાન મદુશંકા, એડમ ઝમ્પા અને મોહમ્મદ શમી.
12મો ખિલાડી: ગેરાલ્ડ કોએત્ઝી.
હિન્દુસ્થાન સમાચાર / સુનીલ / માધવી
