কাৰ্বি আংলং, ২৪ জুন (হি.স.): কাৰ্বি আংলং জিলাৰ বোকাজানৰ আমৰাজানত সংঘটিত হৈছে এক মৰ্মান্তিক ঘটনা। এগৰাকী ছবছৰীয়া কন্যা সন্তানৰ মৃতদেহ উদ্ধাৰ কৰা হৈছে এটা শুকান পকী কুঁৱাত ।
ঘটনা অনুসৰি দেৱবাৰ পৰা অমৰাজান অঞ্চলৰ সুনিতা কুৰ্তি নামৰ মহিলগৰাকীয়ে তেওঁৰ ছবছৰীয়া কন্যা সন্তান নিৰুদ্দেশ হৈ থকাৰ অভিযোগ বোকাজান আৰক্ষী থানাত দাখিল কৰে। বোকাজান আৰক্ষীয়ে নিৰুদ্ধেশ অভিযোগ পোৱাৰ লগে লগে আৰক্ষীৰ এটা বৃহৎ দলে সেই অঞ্চলত অভিযান আৰম্ভ কৰে। আৰক্ষীয়ে কণমানিজনীৰ নিৰুদ্দেশৰ তদন্ত চলাই থকা কালছোৱাতেই ঘৰৰ ওচৰৰ এঘৰ মানুহৰ চোতালত থকা এটা শুকান কুঁৱাত কালি বিয়লি সন্দেহ হোৱাত ভালদৰে চোৱাত কুঁৱাৰ ভিতৰত কণমানিজনীৰ মৃতদেহ আৰক্ষীয়ে প্ৰত্যক্ষ কৰে।
পৰবৰ্তী সময়ত দণ্ডাধীশৰ উপস্থিতিত মৃতদেহটো উদ্ধাৰ কৰা হয়। আনহাতে এই ঘটনাটোৰ লগত জড়িত থকা বুলি আৰক্ষী আৰু স্থানীয় ৰাইজৰ সন্দেহ হোৱা কণমানিজনীৰ ঘৰৰ কাষতেই থকা আন এঘৰত ভাৰাতীয়া হিচাবে থকা ৰঞ্জিত বসুমতাৰী ওৰফে (বাবু)নামৰ যুৱক জনক আৰক্ষী আৰু স্থানীয় ৰাইজে সোধ-পোচৰ চেষ্টা চলাওতেই সকলোৰে চকুত ধূলি দি সেই অঞ্চলৰ পৰা পলায়ন কৰিবলৈ সক্ষম হয় ।
বৰ্তমান আৰক্ষী আৰু স্থানীয় ৰাইজে কণমানিজনীৰ হত্যাৰ লগত জড়িত থকা বুলি সন্দেহ কৰা পলাতক ৰঞ্জিত বসুমতাৰী ওৰফে (বাবু) ক বিচাৰি আৰক্ষীয়ে অভিযান অব্যাহত ৰাখিছে যদিও বাতৰি লিখাৰ সময়লৈকে হত্যাকাৰীক আটক কৰিবলৈ সক্ষম হোৱা নাই।
হিন্দুস্থান সমাচাৰ / কিশোৰ মিশ্ৰ
