-কোচৰাজবংশী জনগোষ্ঠীৰ এজন মনোনীত সদস্য প্ৰদানৰ দাবী
কোকৰাঝাৰ, ২৯ ছেপ্টেম্বৰ (হি.স.)। বিটিচিত নৱগঠিত বিপিএফ দলৰ চৰকাৰলৈ আদৰণি জনাইছে সদৌ কোচৰাজবংশী ছাত্ৰ সন্থা চমুমুকৈ আক্ৰাছুৱে। বিটিচি নিৰ্বাচনত ২৮ খনকৈ আসন লাভ কৰি বিপিএফ দলে চৰকাৰ গঠনৰ বাবে সকলো আনুষ্ঠানিক প্ৰক্ৰিয়া আৰম্ভ কৰাৰ সময়ছোৱাতে বিটিচিৰ পৰিষদীয় চৰকাৰত এগৰাকী কোচৰাজবংশী সম্প্ৰদায়ৰ মনোনীত সদস্য প্ৰদানৰ দাবী তুলিছে সদৌ কোচৰাজবংশী ছাত্ৰ সন্হা চমুকৈ আক্ৰাছুই ৷ কোকৰাঝাৰ প্ৰেছ ক্লাৱত আক্ৰাছুৰ সভাপতি দ্বিপেন ৰায়ে এক সংবাদমেল সম্বোৰ্ধন কৰি বিটিচিত হাগ্ৰামা মহিলাৰী নেতৃত্বাধীন বিপিএফ দলৰ চৰকাৰত এজনো কোচ ৰাজবংশী সম্প্ৰদায়ৰ নিৰ্বাচিত প্ৰতিনিধি নথকা বা বিপিএফে জনগোষ্ঠেটোৰ এজনো প্ৰাৰ্থীত্ব নিদিয়াৰ উল্লেখ কৰি বিপিএফ দলৰ চৰকাৰখনত এজন সু-যোগ্য কোচৰাজবংশী জনগোষ্ঠীৰ নেতাক মনোনীত সদস্য পদ দিয়াৰ দাৱী উত্থাপন কৰিছে ৷ সংবাদমেলত আক্ৰাছুই উক্ত মনোনীত পাৰিষদ জনক কাৰ্যবাহী সদস্যৰ পদ দিয়াৰো আহ্বান জনাইছে ৷ লগতে আক্ৰাছুৱে হাগ্ৰামা মহিলাৰী নেতৃত্বাধীন বি পি এফ দলৰ চৰকাৰক আদৰণি জনাই বিপিএফ দলে কোচৰাজবংশী জনগোষ্ঠীৰ জনজাতিকৰণ প্ৰসংগত পূৰ্ৱৰ যি স্থিতি তাত এইবাৰো অটল থাকিৱ বুলি আশা ব্যক্ত কৰে ৷
সংবাদমেলত আক্ৰাছুৱে অসম সন্তান তথা শিল্পী জুবিন গাৰ্গৰ অকাল বিয়োগত শোক প্ৰকাশ কৰি জুবিন গাৰ্গৰ ৰহস্য জনক মৃত্যুক অসম চৰকাৰে সঠিক তদন্ত কৰি অসম বাসীক ন্যায় দিয়াৰ দাবী উত্থাপন কৰে৷ আজিৰ সংবাদমেলত আক্ৰাছুৰ উপদেষ্টা বিশ্বজিৎ বৰ্মণ, কাৰ্যকৰী সভাপতি মুকুল কৃঞ্চ বৰ্মণ আৰু সম্পাদক হেমন্ত বৰ্মণ উপস্থিত আছিল৷
—————
হিন্দুস্থান সমাচাৰ / প্ৰকাশ ডেকা
