پیرس اولمپکس: میری کوم نے ہندوستانی ٹیم کے شیف ڈی مشن کے عہدے سے استعفیٰ دیا
نئی دہلی ۔ باکسنگ لیجنڈ اور 2012 کے اولمپک گیمز میں کانسے کا تمغہ جیتنے والی ایم سی میری کوم نے ذاتی وجوہات کا حوالہ دیتے ہوئے پیرس اولمپک گیمز کے لیے ہندوستانی دستے کے شیف ڈی مشن کے طور پر استعفیٰ دے دیا ہے۔
انڈین اولمپک ایسوسی ایشن (آئی او اے) کی صدر پی ٹی اوشا نے اعلان کیا کہ میری کوم نے انہیں لکھے ایک خط میں اپنے عہدے سے فارغ ہونے کی درخواست دی ہے۔ آئی او اے کی صدر کو اپنے خط میں، میری کوم نے کہا کہ وہ پیرس 2024 میں شیف ڈی مشن کے طور پر خدمات انجام دینے کے لیے اوران پر اعتماد کرنے کے لیے انڈین اولمپک ایسوسی ایشن کی شکر گزار ہیں۔
انہوں نے لکھا کہ میں اپنے ملک کی ہر ممکن خدمت کرنا اعزاز سمجھتی ہوں اور میں اس کے لیے ذہنی طور پر تیار بھی تھی۔ استعفیٰ دینا افسوسناک ہے لیکن میرے پاس کوئی چارہ نہیں ہے۔ آئی او اے کی سربراہ نے ایک بیان میں کہا، ہمیں افسوس ہے کہ اولمپک میڈلسٹ باکسر اور آئی او اے ایتھلیٹس کمیشن کی چیئرپرسن میری کوم نے ذاتی وجوہات کا حوالہ دیتے ہوئے استعفیٰ دے دیا ہے۔ ہم ان کے فیصلے اور ان کی ذاتی وجوہات کا احترام کرتے ہیں۔ جلد ہی میری کوم کے متبادل کے بارے میں مشورہ کرکے اعلان کریں گے۔
41 سالہ باکسرمیری کوم نے اولمپک گیمز (2016 اور 2020) کے دو ایڈیشنوں میں ملک کی نمائندگی کی، لندن میں 2012 گیمز میں کانسے کا تمغہ جیتا لیکن ٹوکیو میں تمغہ حاصل کرنے سے محروم رہیں۔
پیرس اولمپکس 26 جولائی سے 11 اگست تک فرانس کے دارالحکومت میں منعقد ہونے والے ہیں۔
