سری لنکا اور جنوبی افریقہ کے خلاف گروپ میچوں میں نہیں کھیل سکیں گے زخمی ہاردک پانڈیا
نئی دہلی، 2 نومبر (ہ س)۔ ہندوستانی آل راؤنڈر ہاردک پانڈیا ورلڈ کپ میں سری لنکا اور جنوبی افریقہ کے خلاف مزید دو میچ نہیں کھیل سکیں گے کیونکہ وہ بنگلہ دیش کے خلاف ٹخنے کی انجری سے صحت یاب ہو رہے ہیں۔ پانڈیا نے 19 اکتوبر کے بعد سے کوئی میچ نہیں کھیلا ہے۔
ہندوستانی کرکٹ ٹیم کے کپتان روہت شرما نے بدھ کو پری میچ کانفرنس میں کہا، ’’انجری کے بعد وہ جس بھی عمل سے گزرے وہ بہت مثبت تھا۔ وہ واضح طور پر سری لنکا کے خلاف میچ کے لیے دستیاب نہیں ہیں لیکن یہ ایک ایسی چوٹ ہے کہ ہمیں ہر روز دیکھنا پڑتا ہے کہ وہ کتنے فیصد ٹھیک ہوئے ہیں، وہ کتنی گیندبازی کر رہے ہیں، کتنی بلے بازی کر رہے ہیں۔ اس لیے ہم ہر روز ان پر نظر رکھے ہوئے ہیں۔ جس طرح سے یہ چل رہا ہے، امید ہے کہ ہم اسے جلد دیکھنے کے قابل ہو جائیں گے۔ میں ابھی اتنا ہی کہہ سکتا ہوں۔‘‘
پانڈیا بنگلہ دیش کے خلاف اس وقت زخمی ہو گئے تھے جب فالو تھرو میں شاٹ کو روکنے کی کوشش کرتے ہوئے ان کا بائیں ٹخنہ مڑ گیا۔ انہوں نے اس میچ میں مزید کوئی کردار ادا نہیں کیا اور انہیں اسکین کے لیے لے جایا گیا۔ چوٹ کی وجہ سے پانڈیا دھرم شالہ میں نیوزی لینڈ کے خلاف ہندوستان کے اگلے میچ سے باہر ہوگئے تھے اور حالانکہ آل راؤنڈر کے انگلینڈ کے خلاف 29 اکتوبر کو لکھنؤ میں ہونے والے میچ کے لیے براہ راستہ ٹیم میں شامل ہونے کی امید تھی، لیکن انہیں اس میچ سے بھی باہر بیٹھنا پڑا۔
ہندستان اس وقت پوائنٹس ٹیبل میں سرفہرست ہے اور 6 میچوں میں چھ جیت کے ساتھ ٹورنامنٹ میں واحد ناقابل شکست ٹیم ہے۔ انہیں جنوبی افریقہ کے خلاف میچ کے لیے کولکاتا جانے سے قبل 2 نومبر کو ممبئی میں سری لنکا سے کھیلنا ہے۔ اس کے بعد، ہندوستان بنگلور میں نیدرلینڈ سے مقابلہ کرکے لیگ مرحلے کا اختتام کرے گا۔
ہندوستھان سماچار
/شہزاد
