ایڈیلیڈ، 21 دسمبر (ہ س)۔ آسٹریلیا نے ایشز کے تیسرے ٹیسٹ میں انگلینڈ کو 82 رنوں سے شکست دے دی۔ ایڈیلیڈ میں کھیلے گئے ٹیسٹ میچ میں آسٹریلیا نے وکٹ کیپر بلے باز ایلکس کیری کی سنچری (106) اور عثمان خواجہ کی نصف سنچری (82) کی بدولت پہلی اننگز میں 371 رن بنائے۔ جواب میں انگلینڈ نے اپنی پہلی اننگز میں کپتان بین اسٹوکس کے 83 رنوں کی بدولت 286 رن بنائے اور آسٹریلیا کو 85 رنوں کی برتری دلا دی۔
دوسری اننگز میں میزبان ٹیم نے اوپنر ٹریوس ہیڈ کے شاندار 170 رنوں کی بدولت 349 رن بنائے اور مجموعی طور پر 434 رنوں کی برتری حاصل کر لی۔ اس سے انگلینڈ کو جیت کے لیے 435 رنوں کا ہدف ملا۔ اس کے جواب میں اتوار کو میچ کے آخری دن انگلینڈ کی ٹیم دوسری اننگز میں 352 رنوں پر آل آؤٹ ہو گئی اور اسے مسلسل تیسرا میچ ہارنا پڑا۔ اس فتح کے ساتھ ہی میزبان آسٹریلیا نے پانچ میچوں کی ایشز سیریز میں 0-3 کی ناقابل تسخیر برتری حاصل کر لی ہے۔ آسٹریلوی ٹیم نے پہلا ٹیسٹ 8 وکٹوں سے جیتا تھا اور پھر دوسرا ٹیسٹ بھی 8 وکٹوں سے جیتا۔ سیریز کا اگلا میچ 26 دسمبر سے میلبورن میں کھیلا جائے گا۔
انگلینڈ کی دوسری اننگز 352 پر سمٹ گئی۔ چوتھے دن کے اسکور 6 وکٹ پر 207 رنوں کے جواب میں، انگلینڈ نے اتوار کو پانچویں دن کچھ دیر کے لیے جدوجہد کی۔ ٹیم نے اچھی شروعات کی۔ جیمی اسمتھ اور ول جیکس نے 50 رنوں کی شراکت سے ٹیم کے لیے کچھ امیدیں پیدا کیں تاہم جیمی اسمتھ 285 کے اسکور پر روانہ ہوگئے، انہوں نے 83 گیندوں پر 60 رن بنائے اور کمنز کی گیند پر مچل اسٹارک کے ہاتھوں کیچ آؤٹ ہوگئے۔ اس کے بعد ول جیکس 47 رن بنا کر آؤٹ ہوئے۔ جوفرا آرچر 3 رن بنا کر سستے میں آؤٹ ہو گئے اور جوش ٹونگ 1 رن بنا کر آؤٹ ہوئے۔ برینڈن کارسن 39 رن بنا کر ناٹ آؤٹ رہے۔اس سے قبل جیک کراؤلی نے 85، جو روٹ نے 39 اور ہیری بروک نے 30 رن بنائے۔ انگلینڈ کی دوسری اننگز 352 رنوں پر ختم ہوئی اور وہ ایشز سیریز ہار گئے۔
آسٹریلیا کی جانب سے کپتان پیٹ کمنز، فاسٹ باؤلر مچل سٹارک اور اسپنر نیتھن لیون نے تین تین جبکہ اسکاٹ بولانڈ نے ایک وکٹ حاصل کی۔
آسٹریلیا نے پہلی اننگز میں 371 رن بنائے۔ ٹاس جیت کر پہلے بیٹنگ کرنے والے آسٹریلیا نے اپنی پہلی اننگز میں 371 رن بنائے۔ وکٹ کیپر بلے باز ایلکس کیری نے شاندار سنچری اسکور کی، انہوں نے 143 گیندوں پر آٹھ چوکوں اور ایک چھکے کی مدد سے 106 رن بنائے۔ ان کے علاوہ بلے باز عثمان خواجہ نے 126 گیندوں پر 10 چوکوں کی مدد سے 82 رن بنائے اور مچل اسٹارک نے 75 گیندوں پر 54 رن بنائے۔ کوئی اور بلے باز بڑی اننگز نہیں کھیل سکا۔
انگلینڈ کی جانب سے فاسٹ بولر جوفرا آرچر نے پانچ وکٹیں حاصل کیں۔ برینڈن کارس اور ول جیکس نے دو دو اور جوش ٹونگ نے ایک وکٹ حاصل کی۔
انگلینڈ کی پہلی اننگز
انگلش ٹیم نے اپنی پہلی اننگز میں 286 رن بنائے۔ ٹیم کے کپتان بین اسٹوکس نے 198 گیندوں کا سامنا کرتے ہوئے 83 رنوں کی نصف سنچری اسکور کی۔ کپتان کے علاوہ فاسٹ بولر جوفرا آرچر نے 51، ہیری بروک نے 45، بین ڈکٹ نے 29 رن بنائے۔
آسٹریلیا کی جانب سے پیٹ کمنز نے تین، اسکاٹ بولنڈ نے تین تین، نیتھن لیون نے دو اور مچل اسٹارک اور کیمرون گرین نے ایک ایک وکٹ حاصل کی۔
آسٹریلیا کی دوسری اننگز: اوپنر ٹریوس ہیڈ کی سنچری اور ایلکس کیری کی نصف سنچری کی مدد سے آسٹریلیا نے میچ کی دوسری اننگز میں 349 رن بنائے۔ ہیڈ نے 219 گیندوں پر 170 رنوں کی شاندار اننگز کھیلی، اپنی اننگز میں 16 چوکے اور دو چھکے لگائے۔ اس دوران ایلکس کیری نے 128 گیندوں میں چھ چوکوں کی مدد سے 72 رن بنائے۔ ان دو کھلاڑیوں کے علاوہ عثمان خواجہ نے 40 رنوں کا حصہ ڈالا۔
انگلینڈ کی جانب سے دوسری اننگز میں جوش ٹونگ سب سے کامیاب باؤلر رہے جنہوں نے چار وکٹیں حاصل کیں۔ ان کے علاوہ برینڈن کارس نے تین وکٹیں حاصل کیں۔ جوفرا آرچر، بین اسٹوکس اور ول جیکس نے ایک ایک وکٹ حاصل کی۔
—————
ہندوستان سماچار / عبدالسلام صدیقی
