پٹنہ ۔ بہار میں لوک سبھا انتخاب 2024 کو لیکر این ڈی ا ے کی اتحادی جے ڈی یو کے قومی صدر ،وزیر اعلیٰ نتیش کمار انتخابی تشہیر کے لئے بہار کے کئی اضلاع کا دورہ کر نے والے ہیں۔ خاص بات یہ ہے کہ وزیر اعلیٰ نتیش کمارمخصوص انتخابی رتھ کے ذریعے انتخابی مہم میں حصہ لیں گے۔ یہ ایک طویل عرصے کے بعد ہوگا جب وزیر اعلیٰ نتیش کمار ہیلی کاپٹر کے بجائے بس کا استعمال کریں گے۔
انتخابی رتھ تیار ہے جسے نشچئے رتھ کا نام دیا گیا ہے، رتھ پر لکھا ہے کہ خدمت ہمارا مذہب ہے۔ روزگار کا مطلب ہے نتیش حکومت ، پورا بہار ہمارا خاندان ہے۔ وزیر نتیش جمعہ کے روز یعنی آج اس رتھ میں نوادہ میں انتخابی مہم چلائیں گے۔ دوپہر 12.30 بجے ورث علی گنج، نوادہ میں انتخابی جلسہ سے خطاب کریں گے ۔ آئندہ روز 13 اپریل وہ گیا کے باراچھٹی میں صبح 11.30 بجے ایک انتخابی جلسہ عام سے خطاب کریں گے ۔ اسی دن وہ اورنگ آباد میں انتخابی مہم بھی چلائیں گے اور 12.30 بجے اورنگ آباد لوک سبھا کے امام گنج میں انتخابی ریلی سے خطاب کریں گے ۔
سیاست کا درجہ حرارت بڑھ گیا ہے۔ تمام سیاسی جماعتوں نے اپنی پوری طاقت لگا دی ہے۔ انتخابی مہم دن رات جاری ہے۔ ایک طرف نیشنل ڈیموکریٹک اتحاد(این ڈی اے) کی طرف سے وزیر اعظم نریندر مودی ، وزیر داخلہ امت شاہ ، وزیر دفاع راج ناتھ سنگھ اور بی جے پی صدر جے پی نڈا بہار اور دیگر ریاستوں کا دورہ کر رہے ہیں۔
قابل ذکر ہے کہ پہلے مرحلے میں بہار کی چار سیٹوں پر انتخابات ہونے ہیں۔ ان میں نوادہ ، اورنگ آباد ، گیا اور جموئی شامل ہیں ۔ پہلے مرحلے میں 19 اپریل کو ووٹنگ ہوگی ، اس کو ذہن میں رکھتے ہوئے وزیر اعلیٰ نتیش کے پروگرام کا اعلان کیا گیا ہے۔
