ٹاسک فورس کی سختی کام نہیں آ رہی، چکن فروشوں نے من مانی طریقے سے بڑھائیں قیمتیں
کولکاتا، 21 دسمبر (ہ س)۔ خوردہ بازاروں میں اشیائے خوردونوش کی قیمتوں کو کنٹرول کرنے کی وزیر اعلیٰ ممتا بنرجی کی ہدایات کا کوئی اثر نہیں ہو رہا ہے۔ اس کے لیے بنائی گئی ٹاسک فورس کی سختی بھی کام نہیں کر رہی ہے کیونکہ کولکاتا میں گزشتہ 10 دنوں میں شہر میں چکن کی خوردہ قیمت میں تقریباً 60 روپے فی کلو کا اضافہ ہوا ہے۔ اشیائے ضروریہ کی قیمتوں کو کنٹرول میں رکھنے کے لیے قائم ٹاسک فورس کے ایک رکن کے مطابق کولکاتا کے خوردہ بازاروں میں چکن کی اوسط قیمت 220 سے 230 روپے فی کلو کے درمیان ہے۔ جبکہ ایک ہفتہ قبل چکن کی قیمت 160 سے 170 روپے فی کلو تھی۔ متوسط طبقے کے صارفین کے لیے اس سستی خوراک کی قیمتوں میں بے تحاشاہ اضافہ اب ٹاسک فورس کے اراکین کے لیے درد سر بن گیا ہے۔
ٹاسک فورس ممبر کے مطابق موسم سرما کی آمد کے ساتھ ہی شہر کے مختلف علاقوں میں وائرس کے حملے سے پولٹری فارمز میں مرغیوں کے مرنے کے متعدد واقعات رپورٹ ہوئے ہیں جس کی وجہ سے شہرکے خوردہ بازاروں میں چکن کی سپلائی میں خلل پڑا ہے۔
ٹاسک فورس کے ایک رکن نے کہا کہ عام طور پر مغربی بنگال میں ہر ماہ چکن کی اوسط مانگ تقریباً 3.5 لاکھ کلو گرام ہے، جو سال کے آخر میں پکنک منانے کی وجہ سے سردیوں کی آمد کے ساتھ بڑھ جاتی ہے۔ لیکن، اس سال وائرس سے مرغی کی موت کی وجہ سے مانگ میں اضافہ ہوا ہے اور کافی رسد نہیں ہے۔ چکن کے علاوہ انڈوں کی قیمت میں بھی اضافہ ہوا ہے جس کے باعث متوسط طبقے کے صارفین کی مشکلات میں اضافہ ہوگیا ہے۔ شہر کی خوردہ بازار میں ایک انڈے کی اوسط قیمت 8 روپے کے لگ بھگ ہے جبکہ ایک ماہ قبل یہ 5.50 روپے تھی۔
ہندوستھان سماچار
/شہزاد
