شدید سردی کے پیش نظر گیا ضلع میں کی گئی خصوصی تیاری
گیا، 4 جنوری (ہ س)۔ بہار شدید سردی کی زد میں ہے۔ بہار کے سب سے سرد مقام کے طور پر گیا ضلع رہا، یہاں درجہ حرارت 5.3 ڈگری تک پہنچ گیا ہے۔ موسم سرماں میں یہ پہلا موقع ہے جب سب سے کم درجہ حرارت گیا میں درج کیا گیا ہے۔ اب اس شدید سردی سے بچاؤ اور راحت کے انتظامات ضلع انتظامیہ، میونسپل کارپوریشن اور نگر پنچایتوں کی جانب سے کیے جا رہے ہیں۔ ضلع کے 200 عوامی مقامات پر الاؤ جلانے کا بھی انتظام کیا گیا ہے۔
اس سال حکومت بہار کے سماجی تحفظ محکمہ کی طرف سے ضلع گیا کو کل 10 لاکھ 53 ہزار روپے الاٹ کئے گئے تھے۔ اس رقم کو ضلع مجسٹریٹ نے ضلع کے چار سب ڈویژن کے ساتھ سماجی تحفظ سیل میں تقسیم کر رقم بھیج دی گئی ہے تاکہ سب ڈویزن کے تمام علاقوں میں اس شدید سردی سے بچاؤ کے لیے ضرورت مندوں میں کمبل تقسیم کیے جائیں۔
سماجی تحفظ سیل کے مطابق گیا صدر سب ڈویژن میں 3 لاکھ 50 ہزار، شیر گھاٹی سب ڈویژن میں 2 لاکھ 40 ہزار، ٹیکاری سب ڈویژن میں 1 لاکھ 90 ہزار، بتھانی سب ڈویژن کو 1 لاکھ 70 ہزار روپے ملے ہیں جبکہ سماجی تحفظ سیل کو ایک لاکھ تین ہزار روپے دیے گئے ہیں تاکہ یہ سبھی سب ڈویژن اپنے ماتحت بلاکوں میں سردی سے بچاؤ کے لیے کمبل خرید کر ضرورت مندوں تک پہنچاسکیں۔ جبکہ گیا سماجی تحفظ سیل کی جانب سے شہر گیا میں 172 کمبل اب تک تقسیم کیے جاچکے ہیں جبکہ اس کے علاوہ محکمہ آفات منیجمنٹ کی جانب سے الگ بجٹ ضلع کو دیا گیا ہے جس کے تحت الاؤ جلانے کے انتظامات کیے گئے ہیں۔
اس حوالے سے ضلع مجسٹریٹ ڈاکٹر تیاگ راجن نے کہا کہ شدید سردی کے پیش نظر مسلسل کمبل تقسیم کرنے کا سلسلہ جاری ہے۔ مقامی سطح پر اور سرکل کی سطح پر بھی اس کام کو انجام دیا جا رہا ہے۔ اس کے علاوہ الاؤ جلانے کا بھی نظم کیا گیا ہے۔ مستقل اور عارضی رین بسیروں میں اضافی انتظامات کیے گئے ہیں تاکہ ویسے لوگ جو شہر میں یومیہ مزدوری کے لیے آتے ہیں اور انہیں قیام کے لیے کوئی جگہ نہیں ہے تو وہ رین بسیروں میں ٹھہر سکتے ہیں۔ اس کے ساتھ ہی مسلسل نگرانی رکھی جارہی ہے۔ انہوں نے کہا کہ ضلع گیا میں اب تک کہیں سے یہ اطلاع موصول نہیں ہوئی ہے کہ کہیں کوئی شخص ٹھنڈ لگنے کی وجہ سے موت ہوئی ہے۔
ضلع مجسٹریٹ تیاگ راجن نے کہاکہ ضلع گیا میں شدید ٹھنڈ کے پیش نظر اسپتالوں میں علاج کے لیے خصوصی انتظامات کئے گئے ہیں۔ اسپتالوں کو الرٹ موڈ پر رکھا گیا ہے تاکہ صورتحال خراب ہو تو اس وقت ہنگامی اور ہیجانی کیفیت پیدا نہیں ہو۔ اسپتالوں میں کمبل دیے گئے ہیں تاکہ مریضوں کو ٹھنڈ سے بچایا جاسکے۔ انہوں نے کہا کہ وہ خود اس پر نگرانی رکھ رہے ہیں۔ ضلع کے پسماندہ علاقے جیسے اقبال نگر اور دیگر علاقوں میں سردی بچنے کے لیے طور طریقے بھی بتانے کے لیے بیداری مہم چلائی گئی ہے۔
ہندوستھان سماچار/ افضل
/شہزاد
