رامبن کے اکھڑال میں شبانہ آتشزدگی کی واردات، دس دکانیں جل کر خاکستر
جموں، 22 جنوری (ہ س)۔ جموں و کشمیر کے پہاڑی ضلع رامبن کے اکھڑال بازار میں گزشتہ شب شبانہ آتشزدگی کی واردات میں دس دکانوں اور چند کمروں پر مشتمل دو چار منزلہ عمارتیں جل کر خاکستر ہوگئیں۔ حکام کا کہنا ہے اس واردات میں لاکھوں روپے مالیت کی املاک تباہ ہو گئی ہیں۔
متاثرہ افراد اور دیگر افراد نے بس اسٹینڈ اکھڑال کے قریب جمع ہو کر احتجاجی مظاہرہ کیا۔ انہوں نے علاقے میں فائر سروس اسٹیشنوں کی منظوری اور قیام کا مطالبہ کیا۔ ان کا کہنا تھا کہ بانہال اور رامبن سے فائر ٹینڈر دیر سے پہنچے، اور فائر بریگیڈ کی گاڑیوں کو تحصیل ہیڈ کوارٹر اکھڑال پہنچنے میں ایک گھنٹہ لگا۔ اس وقت تک دو دو منزلہ عمارتیں تباہ ہو چکی تھیں۔
پولیس ذرائع کے مطابق آگ تحصیل ہیڈ کوارٹر اکھڑال کے مین بازار میں واقع بیر سنگھ اور بلوان سنگھ کی دو منزلہ عمارت میں لگی۔ اطلاع ملتے ہی ابتدائی طور پر پولیس کی ایک ٹیم موقع پر پہنچ گئی اور مقامی لوگوں کی مدد سے آگ پر قابو پانے کے لیے مہم شروع کی۔ بعد ازاں فائر ٹینڈرز بھی موقع پر پہنچ گئے اور آگ بجھانے کی کارروائی میں مدد کی۔
فائر اینڈ ایمرجنسی ڈپارٹمنٹ کے اسسٹنٹ ڈائریکٹر رامبن ساحل بندرال نے بتایا کہ آگ بجھانے کے لیے تین فائر ٹینڈر اکھڑال بھیجے گئے تھے۔ انہوں نے کہا کہ بھرپور کوششوں کے بعد آگ پر قابو پالیا گیا لیکن اس وقت تک 10 دکانوں پر مشتمل دو منزلہ عمارتیں جل کر خاکستر ہوگئیں۔ واقعے میں کسی کے زخمی یا جانی نقصان کی اطلاع نہیں ہے۔ آگ لگنے کی وجہ معلوم کرنے کے لئے پولیس نے معاملہ درج کرکے تحقیقات شروع کر دی ہے۔
ہندوستھان سماچار
/شہزاد
