کولکاتا، 23 نومبر (ہ س)۔ مغربی بنگال میں کروڑوں روپے کے راشن گھوٹالہ میں ملوث ہونے کے الزام میں گرفتار وزیر جیوتی پریہ ملک کی صحت مزید بگڑ گئی ہے۔ اس کے بعد سرکاری سیٹھ سکھلال کرنانی میموریل (ایس ایس کے ایم ) اسپتال نے ان کی صحت پر نظر رکھنے کے لیے ایک میڈیکل بورڈ تشکیل دیا ہے۔ ایک اہلکار نے جمعرات کو یہ معلومات دی۔
ملک کو انفورسمنٹ ڈائریکٹوریٹ نے کروڑوں روپے کے راشن گھوٹالہ میں مبینہ طور پر ملوث ہونے کے الزام میں گرفتار کیا تھا۔ اہلکار نے بتایا کہ منگل کی رات ملک کے خون میں شکر کی سطح بڑھ گئی تھی، جس کے بعد انہیں پریزیڈنسی جیل سے ایس ایس کے ایم اسپتال لے جایا گیا تھا۔ انہوں نے کہا کہ اسپتال کے کارڈیالوجی ڈیپارٹمنٹ میں داخل وزیر نے بدھ کی صبح اپنے جسم کے بائیں جانب بے حسی کی شکایت کی۔
اہلکار نے کہا”ان کا ایم آر آئی کیا گیا ۔ ہم رپورٹ کا انتظار کر رہے ہیں۔ ہم نے جامع معائنے کے لیے نیورولوجی، اینڈو کرائنولوجی، میڈیسن، نیفرولوجی، یورولوجی اور کارڈیالوجی کے شعبوں سے ہر ایک ڈاکٹروں کی ایک ٹیم تشکیل دی ہے۔ ہم اس کی صحت پر نظر رکھیں گے اور فیصلہ کریں گے کہ آگے کیا کرنا ہے۔
ملک ہائی بلڈ شوگر اور دیگر امراض میں مبتلا ہیں۔ انہیں اس سال اکتوبر میں گرفتار کیا گیا تھا۔ اس کے بعد سے وہ مسلسل یہ دعویٰ کر رہے ہیں کہ ان کی صحت خراب ہو رہی ہے۔
ہندوستھان سماچار
