جموں و کشمیر میں گزشتہ 24 گھنٹوں کے دوران ڈینگی کے 115 معاملے درج
جموں، 18 اکتوبر (ہ س)۔ جموں و کشمیر کے مختلف حصوں سے گزشتہ 24 گھنٹوں کے دوران ڈینگی کے ایک سو پندرہ نئے کیس رپورٹ ہوئے۔ اس کے ساتھ ہی رواں سال ڈینگی کے کل معاملات کی تعداد 3709 ہوگئی ہے۔
محکمہ صحت کے ایک اہلکار نے بتایا کہ آج صرف جموں ضلع سے 75 کیس رپورٹ ہوئے جبکہ سانبہ سے 15، ادھم پور سے 11، رامبن سے 5، کٹھوعہ سے 3، راجوری اور ریاسی اضلاع سے 2، پونچھ سے 1 اور جموں و کشمیر سے باہر 1 کیس رپورٹ ہوئے۔ اُنہوں نے مزید کہا کہ مثبت مریضوں میں 102 بالغ اور 13 بچے شامل ہیں۔ انہوں نے کہا کہ اب تک سب سے زیادہ 2497 معاملے جموں ضلع سے ہیں، اس کے بعد ضلع ادھم پور میں 424، کٹھوعہ میں 281 اور سانبہ میں 250 کیسز ہیں۔
عہدیدار نے کہا کہ راجوری میں 70، ریاسی میں 41، رامبن میں 37، ڈوڈہ میں 29، پونچھ میں 24، کشتواڑ میں 4، کشمیر میں 19 اور ملک کے دیگر حصوں سے 29 معاملے سامنے آئے ہیں۔ عہدیدار نے مزید بتایا کہ اب تک ڈینگی کے کل 1216 مریض اسپتالوں میں داخل کیے گئے ہیں جن میں سے 1090 کو ڈسچارج کردیا گیا ہے اور 94 مریض تاحال زیر علاج ہیں۔ جموں میں ڈینگی کے کیسز ہر روز بڑھ رہے ہیں اور شہریوں کو مشورہ دیا کہ وہ اپنے گھروں کے اندر اور اس کے ارد گرد پانی کا جمود نہ ہونے کو یقینی بنائیں کیونکہ ٹھہرے ہوئے پانی میں مچھروں کی افزائش ہوتی ہے۔
ہندوستھان سماچار
/شہزاد
