شمالی ہندوستان میں شدید سردی، کہرے نے دہلی میں ریل اور ہوائی سفر میں ڈالارخنہ
نئی دہلی، 16 جنوری (ہ س)۔ اس وقت پورا شمالی ہندوستان شدید سردی کی گرفت میں ہے۔ قومی دارالحکومت دہلی اور آس پاس کے اضلاع میں شدید سردی نے لوگوں کو گھروں میں قید رہنے پر مجبور کر دیا ہے۔ کہرے نے کئی دنوں سے ریل اور ہوائی مسافروں کو پریشان کر رکھا ہے۔
ریلوے کے ایک سینئر افسر نے منگل کی صبح بتایا کہ آج گھنے کہرے کی وجہ سے ملک کے مختلف حصوں سے دہلی آنے والی 30 ٹرینیں تاخیر سے چل رہی ہیں۔ ہندوستان کے محکمہ موسمیات کے مطابق کہرے اور کم مرئیت کی وجہ سے دہلی کے اندرا گاندھی ہوائی اڈے پر کئی فلائٹ آپریشن میں تاخیر ہوئی۔ محکمہ کے مطابق آج صبح 5:30 بجے دہلی کے صفدرجنگ میں درجہ حرارت 4.8 ڈگری سیلسیس اور پالم میں 7.2 ڈگری سیلسیس ریکارڈ کیا گیا۔ دریں اثنا کرتویہ پتھ پر گھنے کہرے درمیان یوم جمہوریہ پریڈ کی ریہرسل جاری ہے۔
ہندوستانی محکمہ موسمیات کا کہنا ہے کہ شمالی ہندوستان کو مزید چار سے پانچ دن تک کہرے کا سامنا کرنا پڑ سکتا ہے۔ صبح 7 بجے پالم ہوائی اڈے پر حد نگاہ 100 میٹر اور صفدر جنگ ہوائی اڈے پر صبح 7:30 بجے 50 میٹر ریکارڈ کی گئی۔ اس دوران دہلی ایئرپورٹ نے ہوائی مسافروں کے لیے ایک ایڈوائزری جاری کی ہے۔ اس میں سفر کے لیے گھر سے نکلنے سے پہلے ایئر لائنز سے رابطہ کرنے کی صلاح دی گئی ہے۔
اس سے پہلے کل پیر کی صبح دہلی ہوائی اڈے پر کل پانچ پروازوں کو ڈائیورٹ کیا گیا تھا۔ 30 پروازیں تاخیر کا شکار ہوئیں اور 17 منسوخ کر دی گئیں۔ محکمہ موسمیات کے مطابق ویسٹرن ڈسٹربنس آج سے مغربی ہمالیائی خطہ کو متاثر کرسکتا ہے۔ اس کی وجہ سے 16 اور 17 جنوری کو جموں و کشمیر، لداخ، ہماچل پردیش اور اتراکھنڈ میں بارش کے ساتھ برف باری ہوسکتی ہے۔
ہندوستھان سماچار
/شہزاد
