وزیر اعظم مودی آج جموں و کشمیر، راجستھان میں کریں گے جلسہ عام اور دوسہ میں کریں گے روڈ شو
نئی دہلی، 12 اپریل (ہ س)۔ بھارتیہ جنتا پارٹی (بی جے پی) کے سرکردہ رہنما اور وزیر اعظم نریندر مودی لوک سبھا انتخابات میں 400 پار کے عہد کے ساتھ آج جموں و کشمیر میں ایک جلسہ عام سے خطاب کریں گے۔ آج وہ راجستھان میں بی جے پی کے روڈ شو میں حصہ لیں گے۔ بی جے پی نے اپنے آفیشل ایکس ہینڈل پر وزیر اعظم نریندر مودی کے آج کے انتخابی پروگرام کو شیئر کیا ہے۔
بی جے پی کے ایکس ہینڈل کے مطابق وزیر اعظم مودی جموں و کشمیر کے ادھم پور میں صبح 11 بجے بھارتیہ جنتا پارٹی کے جلسہ عام سے خطاب کریں گے۔ اس کے بعد وزیر اعظم مودی راجستھان پہنچیں گے۔ سب سے پہلے وہ راجستھان کے باڑمیر میں دوپہر 2:15 بجے ایک جلسہ عام سے خطاب کریں گے۔ اس کے بعد وہ شام 4:45 بجے دوسہ میں بی جے پی کی روڈ ریلی میں شامل ہوں گے۔
جموں بیورو کے مطابق بی جے پی نے ڈاکٹر جتیندر سنگھ کو ادھم پور لوک سبھا سیٹ سے تیسری بار میدان میں اتارا ہے۔ ڈاکٹر جتیندر سنگھ پچھلے دو لوک سبھا انتخابات میں یہاں سے جیت چکے ہیں۔ بی جے پی نے جلسہ عام میں دو لاکھ لوگوں کی بھیڑ جمع کرنے کا ہدف رکھا ہے۔
ادھم پور میں سیکورٹی کے سخت انتظامات کیے گئے ہیں۔ پولیس، سی آر پی ایف، ایس او جی کی ٹیموں نے جلسہ گاہ کو اپنی حفاظت میں لے لیا ہے۔ سکیورٹی اداروں نے جلسہ گاہ کو مکمل طور پر سیل کر دیا ہے۔ سیکورٹی فورسز کے علاوہ ڈاگ اسکواڈ کی بھی مدد لی جارہی ہے۔ جلسہ گاہ کے ساتھ ہیلی پیڈ بھی تیار کیا گیا ہے۔ وزیراعظم چاپر سے براہ راست ہیلی پیڈ پر اتریں گے۔
