سونیت پور کے جموگورہاٹ میں بی جے پی کارکنوں نے میری گاڑی پر حملہ کیا: جے رام رمیش
گوہاٹی، 21 جنوری (ہ س)۔
آسام کے وزیر اعلیٰ ڈاکٹر ہیمنت بسو سرما نے کانگریس کے سینئر لیڈر جے رام رمیش کی گاڑی پر بی جے پی کارکنوں کے مبینہ حملے کی پولیس تحقیقات کا حکم دیا ہے۔ دراصل، ریاست کے سونیت پور ضلع میں کانگریس لیڈر جے رام رمیش کی گاڑی پر مبینہ حملہ ہوا تھا۔ اس سلسلے میں سوشل میڈیا پر اپنی پوسٹ میں وزیر اعلیٰ ڈاکٹر سرما نے کہا کہ آسام پولیس کے ڈی جی پی جی پی سنگھ کو ہدایت دی گئی ہے کہ وہ مجرموں کے خلاف مقدمہ درج کریں اور الزامات کی تحقیقات کریں۔ انہوں نے ڈی جی پی کے ساتھ جے رام رمیش کی سابق پوسٹ کو بھی شیئر کیا اور لکھا، ‘براہ کرم مقدمہ درج کریں اور الزامات کی تحقیقات کریں۔
کانگریس لیڈر جے رام رمیش نے اتوار کو الزام لگایا کہ آسام کے سونیت پور ضلع میں بی جے پی کارکنوں کے ہجوم نے ان کی گاڑی پر حملہ کیا۔ رمیش نے سوشل میڈیا پلیٹ فارم پر یہ بھی الزام لگایا کہ گاڑی پر پانی پھینکا گیا اور نعرے لگائے گئے۔ جے رام رمیش نے کہا کہ چند منٹ قبل سونیت پور کے جموگورہاٹ میں میری گاڑی پر بی جے پی کے کارکنوں کے ایک بے قابو ہجوم نے حملہ کیا تھا، جس نے ونڈشیلڈ سے بھارت جوڈو نیا یاترا کے اسٹیکر بھی پھاڑ دیے، پانی پھینکا اور نعرے لگائے۔ ہم نے اس پر اپنا ضبط برقرار رکھا۔
رمیش نے سوشل میڈیا پر ایک ویڈیو بھی شیئر کیا۔ویڈیو میں ان کی گاڑی کو کچھ لوگ روکتے ہوئے نظر آئے، جن میں سے کچھ نے اپنے ہاتھوں میں بی جے پی کے جھنڈے اٹھا رکھے تھے۔ کانگریس لیڈر نے آسام کے وزیر اعلیٰ ڈاکٹر سرما کو بھی اس واقعے کے لیے ذمہ دار ٹھہرایا۔رمیش نے کہا، بلاشبہ یہ آسام کے وزیر اعلیٰ ہیمنت بسوا کا کام ہے۔ ہم ڈرنے والے نہیں اور لڑیں گے۔
ہندوستھان سماچار
/عطاءاللہ
