نئی تعلیمی پالیسی جامع تعلیم کو مکمل کرنے جا رہی ہے: ڈاکٹر کے کستوری رنگن
نئی دہلی، یکم دسمبر (ہ س)۔ نیشنل کریکولم فریم ورک کی نیشنل اسٹیئرنگ کمیٹی کے چیئرمین ڈاکٹر کے کستوری رنگن نے جمعہ کو کہا کہ قومی تعلیمی پالیسی (این ای پی) 2020 جامع تعلیم کو مکمل کرنے جا رہی ہے۔ اس کے ذریعے زندگی کے ہر پہلو کو جامع انداز میں مالا مال کیا جا سکتا ہے۔
ڈاکٹر کے کستوری رنگن یونیورسٹی کے اسپورٹس کمپلیکس کے ملٹی پرپز ہال میں نئے تعینات اساتذہ کے لیے فیکلٹی انڈکشن پروگرام کے افتتاحی پروگرام سے بطور مہمان خصوصی خطاب کر رہے تھے۔ انہوں نے کہا کہ نئی تعلیمی پالیسی کا مقصد کالجوں اور یونیورسٹیوں میں چار سالہ انڈر گریجویٹ پروگرام جیسی تبدیلیاں لانا اور اسکولوں اور کالجوں میں مہارت پر مبنی تعلیم پر زیادہ توجہ دینا ہے۔
اس موقع پر دہلی یونیورسٹی کے وائس چانسلر پروفیسریوگیش سنگھ نے اپنے صدارتی خطاب میں کہا کہ ڈی یو میں ایک سال میں اساتذہ کی نئی تقرریوں کی تعداد 3500 سے زیادہ ہے۔ اتنی مدت میں کسی بھی یونیورسٹی میں تقرریوں کی یہ سب سے بڑی تعداد ہے۔ ہمارے پاس کل 5200 آسامیاں تھیں جن میں سے اب 1700 خالی ہیں۔
انہوں نے کہا کہ تدریس اس زمین پر بہترین پیشہ ہے۔ استاذ ہی اقدار، ثقافت، مطالعہ، خوشی، مثبتیت اور سماج کو مثبت رخ دیتا ہے۔ انہوں نے وہاں موجود اساتذہ سے اپیل کی کہ وہ نعرے بازی نہ کریں۔ اساتذہ نعرے لگاتے اچھے نہیں لگتے۔ وائس چانسلر نے کہا کہ احتجاج کے اور طریقے بھی ہو سکتے ہیں۔ نئی تعلیمی پالیسی پر گفتگو کرتے ہوئے وائس چانسلر نے کہا کہ اگر قومی تعلیمی پالیسی کو حقیقی معنوں میں نافذ کرنا ہے تو ذہنیت کو بدلنا ہو گا۔
ہندوستھان سماچار
/شہزاد
