کولکاتا، 19 نومبر (ہ س)۔ بنگال گلوبل بزنس سمٹ (بی جی بی ایس) اگلے ہفتے مغربی بنگال میں منعقد ہونے جا رہی ہے۔ بنگال کے ہلدیا میں وزیر اعلیٰ ممتا بنرجی کی ڈیپ سی پورٹ کی ترقی میں اہم رول ادا کرنے والے اڈانی گروپ کے چیرپرسن گوتم اڈانی کی اس چوٹی کانفرنس میں آمد پر تذبذب برقرار ہے۔ حکمراں جماعت ترنمول کانگریس کی مہوا موئترا نے جس طرح رشوت لینے کے معاملے میں پارلیمنٹ میں ان کے خلاف سوالات پوچھے اور ترنمول کے دیگر لیڈروں نے بغیر کسی وجہ کے اڈانی گروپ کو نشانہ بنایا، جس کی وجہ سے اس کانفرنس میں کئی دوسرے صنعتی گھرانوں کی شرکت پر بھی تذبذب ہے۔
حالانکہ اس میں ریلائنس انڈسٹریز کے چیئرمین اور منیجنگ ڈائریکٹر مکیش امبانی سمیت آئی ٹی سی، امبوجا نیوٹیا اور ہیرانندانی گروپ جیسی کمپنیوں کے سرکردہ صنعت کاروں کے شرکت کرنے کا امکان ہے۔ ریاستی حکومت کے ایک سینئر عہدیدار نے کہا کہ یہ واضح نہیں ہے کہ اڈانی گروپ کے چیئرپرسن گوتم اڈانی دو روزہ سربراہی اجلاس میں شرکت کریں گےیا نہیں۔ لیکن گروپ کے نمائندے موجود رہیں گے۔ انہوں نے کہا کہ مکیش امبانی کے اس سال بی جی بی ایس میں شرکت کا امکان ہے۔ دیگر صنعت کار جیسے سنجیو گوئنکا، سنجیو پوری، پورنیندو چٹرجی، ہرش وردھن نیوٹیا اور سجن جندل موجود رہیں گے۔
مغربی بنگال کی وزیر اعلیٰ ممتا بنرجی نے ستمبر میں اسپین اور دبئی کے دورے کے دوران سرمایہ کاری کے حصول کے لیے کئی صنعت کاروں سے ملاقات کی تھی۔ اس سال بی جی بی ایس کا انعقاد 21 اور 22 نومبر کو ہونا ہے۔ اختتامی تقریب شہر کے علی پور علاقے کے دھندھانیا اسٹیڈیم میں منعقد ہوگی۔
ہندوستھان سماچار//سلام
