کولکاتا، 5 جنوری (ہ س)۔ مغربی بنگال کے سرخیوں میں رہے راشن تقسیم بدعنوانی معاملے میں گرفتار سابق وزیر خوراک جیوتی پریہ ملک کے دو دیگر قریبی رہنماوں کے گھروں پر ای ڈی نے جمعہ کی صبح-صبح چھاپہ ماری کی ہے۔ حکام نے شمالی 24 پرگنہ کے دونوں ترنمول لیڈروں کے گھروں پر چھاپے مارے ہیں۔ ای ڈی کی ایک ٹیم شمالی 24 پرگنہ کی بنگاوں میونسپلٹی کے سابق چیئرمین شنکر آدیا کے سسرال پہنچی۔ دوسری ٹیم سندیش کھالی کے ترنمول لیڈر شاہجہاں شیخ کے گھر پہنچ گئی ہے۔ذرائع کے مطابق شنکر اور شاہجہاں دونوں سابق وزیر خوراک جیوتی پریہ ملک (بالو) کے ’قریبی‘ ہیں۔
مقامی ذرائع کے مطابق ای ڈی نے جمعہ کی صبح تقریباً 7 بجے بنگاوں کے شمولتلہ میں شنکر کے سسرال کے گھر پر چھاپہ مارا۔ وہاں سرچ آپریشن جاری ہے۔ تاہم ابھی تک یہ معلوم نہیں ہوسکا کہ شنکر گھر کے اندر ہیں یا نہیں۔ ذرائع کے مطابق شنکر جیوتی پریہ کا ہاتھ پکڑ کر سیاسی میدان میں اترے تھے۔ 2005 میں وہ بنگاوں میونسپلٹی کے پہلے کونسلر بنے۔ بعد میں وہ بنگاوں میونسپلٹی کے چیئرمین بن گئے۔ شنکر کی بیوی بھی میونسپلٹی کی چیئرپرسن تھیں۔
دوسری جانب سینٹرل انویسٹی گیشن ایجنسی کی ٹیم صبح سات بجے سندیش کھالی کے سربیریا میں واقع شاہجہان کے گھر پہنچی لیکن گھر پر تالا پڑا ہوا تھا۔ جب کافی دیر تک فون کرنے کے بعد بھی کسی نے جواب نہیں دیا تو ای ڈی کے تفتیشی افسران نے اس مکان کا تالا توڑنے کی کوشش کی۔اس دوران ترنمول کے کئی کارکن موقع پر پہنچ گئے ۔ ان پر مرکزی فورسز کے کام میں رکاوٹ ڈالنے کا بھی الزام ہے۔
ہندوستھان سماچار
