ڈھاکہ کی ہوا کا معیار دنیا میں سب سے خراب، لاہور اور دہلی بھی پیچھے نہیں

ڈھاکہ کی ہوا کا معیار دنیا میں سب سے خراب، لاہور اور دہلی بھی پیچھے نہیں

ڈھاکہ، 11 جنوری (ہ س)۔ ڈھاکہ ایک بار پھر دنیا بھر میں خراب ہوا کے معیار والے شہروں کی فہرست میں سرفہرست ہے۔ جمعرات کو صبح 9 بجے اس کا اے کیو آئی اسکور 280 تھا۔ ایئر کوالٹی انڈیکس کے مطابق ڈھاکہ کی انتہائی خراب ہوا کا معیار لوگوں کی صحت کے لیے سنگین خطرہ کا باعث ہے۔ ڈھاکہ جو طویل عرصے سے فضائی آلودگی کا شکار ہے، سردیوں میں صورت حال زیادہ خراب ہوجاتی ہے اور مانسون میں بہتری آتی ہے۔

ڈھاکہ ٹریبیون کے مطابق ایئر کوالٹی انڈیکس میں ڈھاکہ شہر کی ہوا کا معیار سب سے خراب پایا گیا ہے۔ جبکہ دنیا کے دیگر ممالک میں پاکستان کا لاہور دوسرے، بھارت کا دہلی تیسرے اور کولکاتا چوتھے نمبر پر ہے۔ لاہور کا اے کیو آئی اسکور 234، دہلی کا 224 اور کولکاتا کا 190 پایا گیا ہے۔

جب اے کیو آئی اسکور 101 اور 150 کے درمیان ہوتا ہے تو یہ ہوا کا معیار حساس لوگوں کے لیے نقصان دہ ہوتا ہے۔ جبکہ 200-150 کے درمیان یہ ہر قسم کے لوگوں کے لیے نقصان دہ ہے۔ جبکہ 300-201 کے درمیان ہوا کا معیار بہت خراب ہے، لیکن 301 سے اوپر کا اسکور سب سے خطرناک ہے۔

ورلڈ ہیلتھ آرگنائزیشن (ڈبلیو ایچ او) کے مطابق فضائی آلودگی ہر سال دنیا بھر میں تقریباً 70 لاکھ افراد کی جان لے لیتی ہے۔ فضائی آلودگی دل کے دورے، قلبی امراض، پھیپھڑوں کے کینسر اور صحت کے دیگر سنگین مسائل کا باعث بنتی ہے۔

ہندوستھان سماچار

/شہزاد