کیارا اڈوانی کا شمار بالی ووڈ کی ان چند اداکاراؤں میں ہوتا ہے جنہوں نے بہت کم وقت میں اپنی زبردست اداکاری سے انڈسٹری میں ایک خاص مقام حاصل کیا۔ ان کی مقبولیت ہر فلم کے ساتھ بڑھتی جارہی ہے اور وہ آنے والے وقت میں کئی بڑی فلموں میں نظر آنے والی ہیں۔ حال ہی میں یہ خبریں چل رہی تھیں کہ کیارا اڈوانی ‘کمال اور مینا’ نامی بائیوپک میں ٹریجڈی کوئین مینا کماری کا کردار ادا کرنے جا رہی ہیں۔ اب ہدایت کار سدھارتھ پی ملہوترا نے فلم ‘کمال اور مینا’ کو لے کر جاری بحثوں پر اپنی خاموشی توڑ دی ہے۔
انہوں نے اپنی انسٹاگرام اسٹوری پر واضح پیغام جاری کرتے ہوئے لکھا، میں میڈیا سے درخواست کرتا ہوں کہ وہ ‘کمال اور مینا’ کی کاسٹنگ پر قیاس آرائیاں نہ کریں، اسکرپٹ اب مکمل ہو چکا ہے اور جیسے ہی کاسٹنگ اور دیگر عمل مکمل ہوں گے، ہم اس کا باضابطہ اعلان کریں گے۔ تب تک براہ کرم کسی بھی قسم کی قیاس آرائیوں سے گریز کریں جب تک ہماری طرف سے کوئی تصدیق نہیں ہو جاتی۔ اس بیان سے یہ واضح ہو گیا ہے کہ فلم کی کاسٹنگ ابھی تک فائنل نہیں ہوئی ہے اور کیارا اڈوانی کا نام صرف قیاس آرائیوں کا حصہ تھا۔
کام کی بات کریں تو کیارا اڈوانی ان دنوں اپنی آنے والی فلم ‘وار 2’ کو لے کر مسلسل بحث میں ہیں۔ یہ بہت انتظار کی جانے والی ایکشن فلم رواں سال 14 اگست یعنی یوم آزادی کے موقع پر سینما گھروں میں ریلیز ہونے جا رہی ہے۔ اس فلم میں کیارا کے ساتھ ہریتھک روشن اور جونیئر این ٹی آر بھی اہم کرداروں میں نظر آئیں گے۔ اس کے علاوہ کیارا کے پاس سپر اسٹار یش کے ساتھ فلم ‘ٹاکسک’ بھی ہے جسے ایک بڑے پروجیکٹ کے طور پر دیکھا جا رہا ہے۔ ادھر یہ خبر بھی ہے کہ کیارا جلد ہی ماں بننے والی ہیں جس سے ان کے مداحوں میں خوشی کی لہر دوڑ گئی ہے۔
—————
ہندوستان سماچار / عبدالسلام صدیقی
