تین روز سے لاپتہ نوجوان کی لاش کنویں سے برآمد، معشوقہ پر قتل کا الزام
بانکا، 9 نومبر ۔ بہار کے بانکا کے بوسی تھانہ کے تحت ایک نوجوان کے قتل کا معاملہ سامنے آیا ہے۔ دیر رات نوجوان کی لاش گاؤں کے کنویں سے برآمد ہوئی۔ مقتول کی شناخت نیا گاؤں رہائشی مشتاق انصاری ولد اخلاق انصاری کے طور پر ہوئی ہے۔ نوجوان کے چار بچے ہیں۔ متوفی گزشتہ تین روز سے لاپتہ تھا۔ پولیس نے لاش کو اپنی تحویل میں لے لیا ہے اور معاملے کی تفتیش کر رہی ہے۔
بتایا جاتا ہے کہ بدھ کی دیر رات 33 سالہ نوجوان مشتاق انصاری کی لاش گاؤں کے کنویں میں ایک اینٹ سے بندھی تیرتی ہوئی ملی۔ واقعہ کی اطلاع ملتے ہی بوسی تھانہ پولیس موقع پر پہنچی اور لاش کو کنویں سے باہر نکالا۔ گاؤں والوں کا کہنا ہے کہ متوفی شادی شدہ تھا اور گاؤں کی ہی ایک خاتون سے اس کا عشق چل رہا تھا۔ گاؤں والوں نے بتایا کہ مقتول کی معشوقہ نے دوسرے لوگوں کے ساتھ مل کر اس واردات کو انجام دیا ہے۔
مقتول کی معشوقہ کوپولیس اپنے ساتھ پوچھ گچھ کے لے گئی ہے۔ واقعہ کے بعد مقامی لوگوں کی بھیڑ موقع پر جمع ہو گئی۔ وہاں موجود لوگوں کی معلومات کے مطابق متوفی کے چار چھوٹے بچے ہیں جن میں دو بیٹے اور دو بیٹیاں ہیں۔ شادی سے پہلے بھی نوجوان کا گاؤں کی ایک لڑکی سے عشق چل رہا تھا۔ اسی دوران نوجوان کی شادی ہو گئی لیکن یہ عشق کا سلسلہ جاری رہا۔
وہیں لاش برآمد ہونے کے بعد طرح طرح کی با تیں گاؤں میں ہورہی ہے۔ پولیس نے معاملے کی جانچ شروع کر دی ہے ۔ تھانہ انچارج اروند کمار رائے نے کہا کہ ایف آئی آر متوفی کی بیوی کی طرف سے دی گئی درخواست کی بنیاد پر ہی درج کی جائے گی۔ اب متوفی کی لاش کو تحویل میں لے کر پوسٹ مارٹم کے لیے بانکا بھیج دیا گیا ہے۔
