نئی دہلی، 12 نومبر (ہ س)۔ مہنگائی کے محاذ پر عام آدمی کے لیے راحت کی خبر آگئی۔ خوردہ افراط زر اکتوبر میں 0.25 فیصد کی کئی سال کی کم ترین سطح پر گر گیا۔ یہ موجودہ کنزیومر پرائس انڈیکس (سی پی آئی) سیریز میں سب سے کم سطح ہے۔
شماریات اور پروگرام کے نفاذ کی وزارت نے بدھ کو قومی شماریاتی دفتر (این ایس او) کے جاری کردہ اعداد و شمار کا حوالہ دیتے ہوئے کہا کہ خوردہ افراط زر میں یہ کمی اشیا اور خدمات ٹیکس (جی ایس ٹی) کی شرحوں میں کمی اور سبزیوں اور پھلوں کی قیمتوں میں نرمی کی وجہ سے ہے۔
این ایس او کے جاری کردہ اعداد و شمار کے مطابق کنزیومر پرائس انڈیکس (سی پی آئی) پر مبنی خوردہ افراط زر اکتوبر میں 0.25 فیصد تک گر گیا۔ ستمبر 2024 میں یہ 1.44 فیصد اور اکتوبر 2024 میں 6.21 فیصد تھی۔ اس طرح، ستمبر 2025 کے مقابلے اکتوبر 2025 میں بنیادی افراط زر میں 119 بیسس پوائنٹس کی کمی ہوئی۔ یہ موجودہ سی پی آئی سیریز میں سال بہ سال کی سب سے کم افراط زر ہے۔
قومی شماریاتی دفتر کے جاری کردہ اعداد و شمار کے مطابق اکتوبر میں خوراک کی افراط زر منفی 5.02 فیصد تک گر گئی۔ این ایس او نے کہا کہ اکتوبر 2025 کے دوران مجموعی افراط زر اور غذائی افراط زر میں کمی بنیادی طور پر جی ایس ٹی کی شرح میں کمی، سازگارحالات اور تیل اور چکنائی، سبزیوں، پھلوں، انڈے، جوتے، اناج، ٹرانسپورٹ اور مواصلات کی افراط زر کی شرح میں اعتدال کی وجہ سے آئی ہے۔
—————
ہندوستان سماچار / عبدالسلام صدیقی
