مانیٹری پالیسی کمیٹی کی رپورٹ سے شیئر مارکیٹ کو لگا جھٹکا، سینسیکس-نفٹی گرا
نئی دہلی، 8 فروری ۔ ریزرو بینک آف انڈیا (آر بی آئی) کی مانیٹری پالیسی کمیٹی کی جانب سے شرح سود میں کوئی تبدیلی نہیں کرنے کی وجہ سے آج گھریلو شیئر بازار کو جھٹکا لگا ہے۔ آج کی تجارت کا آغاز مضبوطی کے ساتھ ہوا لیکن جیسے ہی آر بی آئی کے گورنر شکتی کانت داس نے مانیٹری پالیسی کمیٹی کی رپورٹ پیش کی، بازار دباو میں آگیا۔ پہلے ایک گھنٹے کا کاروبار ہونے کے بعد سینسیکس 0.14 فیصد کی کمزوری کے ساتھ اور نفٹی 0.03 فیصد کے معمولی اضافے کے ساتھ کاروبار کر رہے تھے۔
کاروبار کے پہلے گھنٹے کے بعد شیئر مارکیٹ کے بڑے شیئروں میں پاور گرڈ کارپوریشن، بی پی سی ایل، ایس بی آئی، ہنڈالکو انڈسٹریز اور ایچ سی ایل ٹیکنالوجی کے شیئرس 5.64 فیصد سے لیکر 1.34 فیصد کی مضبوطی کے ساتھ کاروبار کر رہے تھے۔ دوسری طرف ٹاٹا کنزیومر پروڈکٹس، برٹانیہ انڈسٹریز، نیسلے، یو پی ایل اور آئی ٹی سی کے شیئرس 2.31 فیصد سے لیکر 1.78 فیصد تک کی گراوٹ کے ساتھ کاروبار کرتے نظر آرہے تھے۔
موجودہ کاروبار میں شیئر مارکیٹ میں 2,033 شیئروں میں ایکٹیو ٹریڈنگ ہورہی تھی۔ ان میں سے 1,157 شیئرس منافع کماکر سبز نشان میں جبکہ 876 حصص خسارے کے بعد سرخ نشان میں کاروبار کر رہے تھے۔ اسی طرح سینسیکس میں شامل 30 شیئروں میں سے 15 شیئرس خریداری کی حمایت کے ساتھ سبز نشان میں بنے ہوئے تھے۔ دوسری جانب فروخت کے دباو کے باعث 15 شیئرس سرخ نشان میں کاروبار کر رہے تھے۔ جبکہ نفٹی میں شامل شیئروں میں سے 24 شیئر سبز نشان میں اور 26 حصص سرخ نشان میں کاروبار کرتے نظر آرہے تھے۔
بی ایس ای کا سینسیکس آج 321.42 پوائنٹس کے اضافے کے ساتھ 72,473.42 پوائنٹس کی سطح پر کھلا۔ کاروبار کے آغاز کے بعد مارکیٹ میں معمولی اتار۔چڑھاو دیکھا گیا۔ لیکن جیسے ہی آر بی آئی کے گورنر نے مانیٹری پالیسی کمیٹی کی رپورٹ پیش کی، مارکیٹ کو زبردست جھٹکا لگا اور انڈیکس 150 پوائنٹس سے زیادہ گر کر 71,983.60 پر پہنچ گیا۔ بازار میں مسلسل خرید و فروخت کے درمیان کاروبار کے پہلے گھنٹے کے بعد صبح 10:15 بجے سینسیکس 102.52 پوائنٹس کی کمزوری کے ساتھ 72,049.48 پوائنٹس کی سطح پر کاروبار کر رہا تھا۔
سینسیکس کی طرح این ایس ای کے نفٹی نے آج 79.15 پوائنٹس کے اضافے کے ساتھ 22,009.65 پوائنٹس پر تجارت شروع کی۔ ابتدائی کاروبار میں یہ انڈیکس بھی معمول کے اتار۔چڑھاو کے ساتھ کاروبار کرتا رہا لیکن جیسے ہی مانیٹری پالیسی کمیٹی کی رپورٹ پیش کی گئی یہ انڈیکس بھی سرخ نشان پر گر کر 21,882.15 پوائنٹس پر پہنچگیا۔ مارکیٹ میں لگاتار خرید و فروخت کے درمیان پہلے گھنٹے کی تجارت کے بعد صبح 10:15 بجے نفٹی 7.35 پوائنٹس کے معمولی اضافے کے ساتھ 21,937.85 پوائنٹس کی سطح پر کاروبار کر رہا تھا۔
