نئی دہلی/اوساکا ، 28 اکتوبر (ہ س)۔
ہندوستان اور برطانیہ نے مجوزہ آزاد تجارتی معاہدے (ایف ٹی اے) پر بات چیت کی جاری پیش رفت کا جائزہ لیا۔ دونوں ممالک کے درمیان یہ جائزہ اوساکا میں ہوا۔ ہندوستان کے کامرس اور صنعت کے وزیر پیوش گوئل اور برطانیہ کے وزیر تجارت کیمی بیڈنوچ نے اس کا جائزہ لیا۔ہفتہ کو ’ایکس‘ پوسٹ پر دی گئی معلومات میں، پیوش گوئل نے کہا کہ انہوں نے برطانوی وزیر تجارت کیمی بیڈنوش کے ساتھ ہندوستان-برطانیہ آزاد تجارتی معاہدے پر جاری بات چیت کی پیشرفت کے بارے میں تبادلہ خیال کیا۔ دونوں ممالک کے درمیان مجوزہ ایف ٹی اے پر مذاکرات آخری مرحلے میں پہنچ گئے ہیں۔ وزیر تجارت نے کہا کہ دونوں ممالک چاہتے ہیں کہ یہ مذاکرات جلد مکمل ہوں۔
وزیر تجارت و صنعت کے مطابق دونوں ممالک کے سینئر حکام کے درمیان ایف ٹی اے کے مجوزہ مذاکرات کو تیزی سے مکمل کرنے ، مصنوعات کی اصل جگہ اور سروس سیکٹر کے قوانین جیسے مسائل پر اختلافات کو دور کرنے کے لیے بات چیت جاری ہے۔ ایف ٹی اے کے مجوزہ معاہدے میں 26 ابواب ہیں ، جن میں سامان ، خدمات ، سرمایہ کاری اور املاک دانش کے حقوق (آئی پی آر) شامل ہیں۔قابل ذکر ہے کہ ہندوستان اور برطانیہ کے درمیان ایک الگ معاہدے کے طور پر سرمایہ کاری کے معاہدے کے بارے میں بھی بات چیت جاری ہے۔ دونوں ممالک نے جنوری 2022 میں آزاد تجارتی معاہدے کے لیے بات چیت شروع کی تھی۔ ان مذاکرات کو گزشتہ سال دیوالی تک مکمل کرنے کا ہدف ( 24 اکتوبر 2022) تھا لیکن برطانیہ میں بدلتی ہوئی سیاسی پیش رفت کی وجہ سے ایسا نہیں ہو سکا۔ تاہم ، دونوں ممالک ایف ٹی اے کے ساتھ بیک وقت دو طرفہ سرمایہ کاری کے معاہدے پر متفق ہونا چاہتے ہیں۔ دونوں ممالک 2023 کے آخر تک آزاد تجارتی معاہدے اور سرمایہ کاری کے معاہدے پر متفق ہونے کی امید رکھتے ہیں۔
ہندوستھان سماچارمحمدخان
