اتار- چڑھاو کے ساتھ نئی بلندی پر شیئر بازار، اوپننگ کے ساتھ آل ٹائم ہائی کا نیا ریکارڈ
نئی دہلی، 7 مارچ ۔ مضبوط عالمی اشاروں کے درمیان گھریلو شیئر بازار آج ابتدائی کاروبار کے دوران مسلسل اتار چڑھاو میں نظر آرہا ہے۔ آج کے کاروبار ی شروعات آل ٹائم ہائی کے نئے ریکارڈ کے ساتھ ہوئی۔ بازار کھلنے کے بعد خریداری کی حمایت سے سینسیکس اور نفٹی دونوں انڈیکس مزید مضبوط ہوکر آل ٹائم ہائی کے نئے لیول تک پہنچ گئے۔ اس کے کچھ دیر بعد فروخت کے دباو کی وجہ سے دونوں انڈیکس گر کر سرخ نشان پر پہنچ گئے۔ تاہم اس کے بعد خریداروں نے ایک بار پھر زور لگایا اور شیئر مارکیٹ کو سبز نشان میں پہنچایا۔ کاروبار کے پہلے گھنٹے کے بعد سینسیکس 0.02 فیصد اور نفٹی 0.04 فیصد کے اضافے کے ساتھ کاروبار کر رہے تھے۔
شروعاتی ایک گھنٹے کا کاروبار ہونے کے بعد شیئر مارکیٹ کے بڑے شیئروں میں سے جے ایس ڈبلیو اسٹیل، ٹاٹا اسٹیل، یو پی ایل، بجاج آٹو اور بجاج فنسرو کے شیئر 2.76 فیصد سے لیکر 1.57 فیصد کی مضبوطی کے ساتھ کاروبار کر رہے تھے۔ دوسری طرف مہندرا اینڈ مہندرا، بی پی سی ایل، ایس بی آئی لائف انشورنس، آئی ٹی سی اور برٹانیہ کے حصص 3.75 فیصد سے لیکر 0.86 فیصد تک کی گراوٹ کے ساتھ کاروبار کرتے نظر آرہے تھے۔
موجودہ کاروبار میں شیئر مارکیٹ میں 2,066 شیئروں میں ایکٹیو ٹریڈنگ ہورہی تھی۔ ان میں سے 1,506 حصص منافع کماکر سبز نشان میں جبکہ 560 شیئرس خسارے کے بعد سرخ نشان میں کاروبار کر رہے تھے۔ اسی طرح سینسیکس میں شامل 30 شیئروں میں سے 19 شیئرس خریداری کی حمایت کے ساتھ سبز نشان میں بنے ہوئے تھے۔ دوسری جانب فروخت کے دباو کے باعث 11 حصص سرخ نشان میں کاروبار کر رہے تھے۔ جبکہ نفٹی میں شامل شیئروں میں سے 29 حصص سبز نشان میں اور 21 حصص سرخ نشان میں کاروبار کرتے نظر آرہے تھے۔
بی ایس ای کا سینسیکس آج 74,242.74 پوائنٹس کی سطح پر کھلا، 156.75 پوائنٹس کی چھلانگ لگا کر مضبوطی کا نیا ریکارڈ بنایا۔ کاروبار کے آغاز کے بعد خریداری کے تعاون سے اس انڈیکس میں اضافہ دیکھا گیا اور 74,245.17 پوائنٹس کی بلند ترین سطح پر پہنچ گیا۔ لیکن اس کے بعد بازار میں خریداروں اور فروخت کنندگان کے درمیان رسہ کشی شروع ہوگئی۔ فروخت کے دباو میں یہ انڈیکس کچھ وقت کے لیے سرخ نشان میں گرکر 73,972.42 پوائنٹس تک پہنچ گیا۔ لیکن اس کے بعد خریداری کی حمایت سے واپس سبز نشان میں کاروبار کرنے لگا۔بازار میں مسلسل خرید و فروخت کے درمیان کاروبار کے پہلے گھنٹے کے بعد صبح 10:15 بجے سینسیکس 15.19 پوائنٹس کے اضافے کے ساتھ 74,101.18 پوائنٹس پر کاروبار کر رہا تھا۔
سینسیکس کی طرح این ایس ای کے نفٹی نے بھی آج مضبوطی کا نیا ریکارڈ بناتے ہوئے 31.25 پوائنٹس کے اضافے کے ساتھ 22,505.30 پوائنٹس پر تجارت شروع کی۔ ابتدائی تجارت میں خریداری کے تعاون سے یہ انڈیکس 22,523.65 پوائنٹس کی بلند ترین سطح پر پہنچ گیا۔ لیکن اس کے بعد خریداروں اور بیچنے والوں کی ایک دوسرے پر غلبہ پانے کی کوشش کی وجہ سے اس کی حرکت بھی اوپر نیچے ہوتی رہی۔ فروخت کے دباو کی وجہ سے یہ انڈیکس کچھ وقت کے لیے گرا اور سرخ نشان تک پہنچ گیا۔ مارکیٹ میں مسلسل خرید و فروخت کے درمیان پہلے ایک گھنٹے کی تجارت کے بعد صبح 10:15 بجے نفٹی 8.90 پوائنٹس کے اضافے کے ساتھ 22,482.95 پوائنٹس کی سطح پر کاروبار کر رہا تھا۔
