آئی ایس ایل : فارم میں چل رہی اڈیشہ کا مقابلہ میزبان ایسٹ بنگال سے ہوگا
کولکاتا، 22 دسمبر (ہ س)۔ ایسٹ بنگال ایف سی انڈین سپر لیگ (آئی ایس ایل) 24-2023 میں اپنے ناقابل شکست سلسلے کو دراز کرنے کی کوشش کرے گی، جب ریڈ اینڈ گولڈ بریگیڈ آج رات کولکاتا میں اپنے ہوم گراونڈ سالٹ لیک اسٹیڈیم میں زبردست فارم میں چل رہی اڈیشہ ایف سی کا مقابلہ کرے گی۔
ریڈ اینڈ گولڈ بریگیڈ نے اپنے آخری چار آئی ایس ایل مقابلوں میں تین ڈرا کھیلے ہیں اور ایک میں جیت حاصل کی ہے، جس میں لیگ کی تاریخ میں ان کی اب تک کی سب سے بڑی جیت بھی شامل ہے، جب انہوں نے نارتھ ایسٹ یونائیٹڈ ایف سی کو 0-5 سے شکست دی تھی۔ حالانکہ اس کے بعد سے انہوں نے پنجاب ایف سی اور ممبئی سٹی ایف سی کے خلاف لگاتار بغیر گول کے ڈرا کھیلے ہیں اور وہ اپنے ہوم گراونڈ پر جوگرناٹس کے خلاف اپنے اسکورنگ ٹچ کو دوبارہ حاصل کرنے کے لیے بے چین ہوں گے۔
ایسٹ بنگال ایف سی سیزن کے پہلے ہاف کے دوران کچھ مثبت نتائج کی وجہ سے پوائنٹس ٹیبل میں ٹاپ چھ مقامات کے قریب ہے۔ یہ ایک ایسی ٹیم کے لیے حوصلہ افزا اشارے ہیں جو ٹیبل کے نچلے حصے میں پڑی تھی اورٹیم کواوپر پہنچانے میں کارلس کواڈراٹ اور ان کے لوگوں کا اثر اہم رہا ہے۔
اڈیشہ ایف سی اس میچ میں حیدرآباد ایف سی کے خلاف اوے میچ میں 0-3 کی شاندار جیت کے بعد اترے گی۔ انہوں نے ہیڈ کوچ تھانگبوئی سنگتو کی ٹیم کو رائے کرشنا کے دو گول اور مورٹاڈا فال کے ایک گول سے آسانی سے شکست دی۔ آئی ایس ایل پوائنٹس ٹیبل میں پانچویں نمبر پر رہنے کے علاوہ اڈیشہ ایف سی نے اے ایف سی کپ ناک آؤٹ میں بھی جگہ بنالی ہے اور اس سے پتہ چلتا ہے کہ ہسپانوی ہیڈ کوچ کی تیار کردہ نسبتاً نئی ٹیم قدرے متزلزل آغاز کے بعد کتنی اچھی طرح سے متحد ہوئی ہے۔
آپ کو بتاتے چلیں کہ دونوں ٹیموں کے درمیان آئی ایس ایل میں اب تک 6 میچ کھیلے جا چکے ہیں۔ جس میں اڈیشہ ایف سی نے 5 میچ جیتے ہیں اور ایسٹ بنگال ایف سی نے 1 میچ جیتا ہے۔
ہندوستھان سماچار
/شہزاد
