نائب صدر کی میمیکری کرنے والے رکن پارلیمنٹ کلیان بنرجی کے رویے سے ممتا بنرجی ناخوش
کولکاتا، 20 دسمبر (ہ س)۔ راجیہ سبھا کے چیئرمین نائب صدر جگدیپ دھنکھڑ کی میمیکری کرنے والے ترنمول کانگریس کے رکن پارلیمنٹ کلیان بنرجی کے رویے سے وزیر اعلیٰ ممتا بنرجی ناراض ہیں۔ ترنمول کانگریس کے ایک لیڈر نے نام ظاہر نہ کرنے کی شرط پر بدھ کو یہ جانکاری دی ہے۔
انہوں نے بتایا ہے کہ جس طرح سے کلیان بنرجی نے پارلیمنٹ کمپلیکس کے باہر جگدیپ دھنکھڑ کا مذاق اڑایا ہے، اس سے لوگ ناراض ہیں۔ کلیان کا ویڈیو سوشل میڈیا پر بڑے پیمانے پر شیئر کیا گیا ہے، جس کے بعد لوگ کہہ رہے ہیں کہ ترنمول کانگریس اور دیگر اپوزیشن جماعتوں کے لوگ خود اپنی شکست کی راہ ہموار کر رہے ہیں۔ سوشل میڈیا پر شیئر کیے گئے اس ویڈیو کو لے کر ترنمول کانگریس بھی تذبذب کی حالت میں ہے۔ آئینی عہدے پر فائز شخص کا اس طرح مذاق اڑانا ناگوار ہے۔ خود ترنمول کانگریس نے اس معاملے پر میڈیا میں عوامی سطح پر ردعمل دینے سے انکار کر دیا ہے۔ پارٹی کے ترجمان کنال گھوش نے اس بارے میں پوچھے جانے پر تبصرہ کرنے سے انکار کردیا۔
بہرحال ایک اور لیڈر نے کہا کہ کلیان بنرجی پہلے ہی اپنے رویے سے پارٹی کو مشکل میں ڈال رہے ہیں۔ بنگال میں بھی انہوں نے ممتا بنرجی بمقابلہ ابھیشیک بنرجی کی بحث شروع کر دی تھی جس کے بعد انہیں معافی مانگنی پڑی تھی۔ اب جبکہ لوک سبھا انتخابات میں کچھ ہی دن باقی ہیں، اس طرح کا رویہ پارٹی کو یقیناً ناگوار گز رہا ہے۔
قابل ذکر ہے کہ شری رام پور لوک سبھا حلقہ سے ترنمول کانگریس کے رکن پارلیمنٹ کلیان بنرجی نے منگل کو پارلیمنٹ کے احاطے میں نائب صدر کی نقالی کی تھی۔ انہوں نے اپوزیشن کے 141 ارکان پارلیمنٹ کی معطلی کے خلاف کانگریس اور دیگر جماعتوں کے ارکان کے ساتھ احتجاج میں حصہ لیا تھا۔ جب وہ نائب صدر کی نقل کر رہے تھے تو راہل گاندھی ان کا ویڈیو بنا رہے تھے۔
ہندوستھان سماچار
/شہزاد
