فائر بریگیڈ کی چھ گاڑیوں نے آٹھ گھنٹے میں آگ پر پایا قابو
آٹھویں منزل پر پھنسے ایک خاندان کے پانچ افراد کوکیا ریسکیو
دہلی سے منگوایا گیا ہائیڈرولک پلیٹ فارم
سونی پت، 12 نومبر (ہ س)۔ نیشنل ہائی وے-44 پر سونی پت کے کماس پور گاوں کے قریب اپیکس گرین سوسائٹی کے سی ٹاور میں ہفتہ کی آدھی رات کو اچانک آگ لگ گئی۔ آگ کے وقت ٹاور میں پچاس سے زائد افراد موجود تھے۔ جن میں سے اکثر سو رہے تھے۔ اچانک آگ لگنے سے لوگوں میں خوف وہراس پھیل گیا۔ اس ٹاور میں 14 منزلوں تک گھر بنے ہوئے ہیں۔
حادثے کی اطلاع ملتے ہی سونی پت اور آس پاس کے علاقوں سے فائر بریگیڈ کی گاڑیاں موقع پر پہنچ گئیں۔ آگ اتنی خوفناک تھی کہ اس نے چند ہی لمحوں میں پورے ٹاور کو اپنی زد میں لے لیا۔ بہال گڑھ پولیس اور سونی پت فائر بریگیڈ کی ٹیموں نے فلیٹ سے لوگوں کو نکال کر آگ پر قابو پانے کی کوشش کی۔ اس بھگدڑ میں کئی لوگوں کو معمولی چوٹیں بھی آئی ہیں۔
اسی دوران فائر بریگیڈ کے اہلکاروں کو معلوم ہوا کہ ٹاور کی آٹھویں منزل میں ایک خاندان پھنسا ہوا ہے۔ جن میں بچوں سمیت پانچ افراد شامل ہیں۔ فائر ڈپارٹمنٹ کے پاس صرف دو منزلوں تک سیڑھیاں تھیں۔ ملازمین نے نیچے سے آگ بجھانے کی کوششیں جاری رکھیں۔
دہلی سے فوری طور پر ہائیڈرولک پلیٹ فارم منگوایا گیا اور اس کی مدد سے آگ میں پھنسے خاندان کو باہر نکالا گیا۔ اس دوران آگ کے دھویں اور بچاو کی جدوجہد کے باعث دم گھٹنے سے اہل خانہ کی حالت بگڑ گئی۔ جنہیں ابتدائی طبی امداد دی گئی۔ فائر ڈپارٹمنٹ کے اسسٹنٹ ڈویژنل افسر راجندر سنگھ دہیا اور بہال گڑھ پولیس اسٹیشن کے انچارج دیویندر کمار کے مطابق آگ پر قابو پالیا گیا ہے۔
تھانہ انچارج نے بتایا کہ آٹھویں منزل پر رہنے والا ایک نوجوان، ان کی حاملہ بیوی اور ان کی آٹھ سالہ بیٹی آگ میں پھنس گئی تھیں۔ خاندان نے ڈیجیٹل لاک کے ساتھ ایک دروازہ لگایا تھا۔ آگ لگتے ہی دروازے کے ڈیجیٹل لاک نے کام کرنا چھوڑ دیا اور دروازہ نہیں کھل سکا۔ جس کی وجہ سے انہیں کافی پریشانی کا سامنا کرنا پڑا۔ فائر ڈپارٹمنٹ کے عملے نے کسی طرح دوسرے ٹاورز کے ذریعے اس منزل تک پہنچ کر خاندان کو بچایا۔
ہندوستھان سماچار//سلام
