– घरेलु प्रयोगका ग्यास सिलिन्डरको मूल्यमा कुनै परिवर्तन छैन
नयाँ दिल्ली, 01 जनवरी (हि.स.)। तेल बजार कम्पनीहरूले नयॉं साल २०२६ को पहिलो दिनमै एलपीजी ग्यास सिलिन्डरको मूल्य बढाएका छन्। तर यो मूल्यवृद्धि केवल १९ किलोग्राम क्षमताको कमर्सियल एलपीजी सिलिन्डरसम्म मात्र सीमित रहेको छ। घरेलु प्रयोगमा आउने १४.२ किलोग्रामको एलपीजी ग्यास सिलिन्डरको मूल्यमा भने कुनै परिवर्तन गरिएको छैन।
वर्षको पहिलो दिनमै कमर्सियल ग्यास सिलिन्डरको मूल्य १११ रुपियाँसम्म बढाइएको छ। नयाँ मूल्य आज अर्थात् ०१ जनवरी २०२६ देखि लागू भएको छ। यस वृद्धिपछि दिल्लीमा १९ किलोग्रामको कमर्सियल एलपीजी सिलिन्डरको मूल्य अब १,६९१.५० रुपियाँ पुगेको छ। यसअघि यो सिलिन्डर १,५८०.५० रुपियाँमा उपलब्ध थियो।
त्यसैगरी कोलकातामा १९ किलोग्रामको कमर्सियल एलपीजी सिलिन्डरको मूल्य १,६८४ रुपियाँबाट बढेर १,७९५ रुपियाँ पुगेको छ। मुम्बईमा अब यसको मूल्य १,६४२.५० रुपियाँ भएको छ, जबकि पहिले १,५३१.५० रुपियाँ थियो। चेन्नईमा १९ किलोग्रामको कमर्सियल एलपीजी सिलिन्डरको मूल्य १,७३९.५० रुपियाँबाट बढाएर १,८४९.५० रुपियाँ पुगेको छ।
उल्लेखनीय छ, १९ किलोग्रामको कमर्सियल एलपीजी सिलिन्डर होटल, रेस्टुरेन्ट, ढाबा तथा अन्य व्यावसायिक संस्थानहरूमा प्रयोग गरिन्छ। यसअघि वर्षको अन्तिम महिना दिसम्बरमा १९ किलोग्रामको कमर्सियल एलपीजी सिलिन्डरको मूल्य घटाइएको थियो। गत महिना १ दिसम्बर, २०२५ देखि दिल्ली र कोलकातामा १० रुपियाँ, भने मुम्बई र चेन्नईमा ११ रुपियाँ प्रतिसिलिन्डर सस्तो बनाइएको थियो।
घरेलु प्रयोगमा आउने १४.२ किलोग्रामको एलपीजी सिलिन्डर (भान्साग्यास) को मूल्यमा गत वर्ष अप्रिलयता हालसम्म कुनै परिवर्तन गरिएको छैन। घरेलु एलपीजी सिलिन्डरको मूल्यमा अन्तिम पटक ८ अप्रेल, २०२५ मा परिवर्तन गरिएको थियो। हाल दिल्लीमा १४.२ किलोग्रामको घरेलु ग्यास सिलिन्डरको मूल्य ८५३ रुपियाँ छ। त्यसैगरी कोलकातामा ८७९ रुपियाँ, मुम्बईमा ८५२.५० रुपियाँ, चेन्नईमा ८६८.५० रुपियाँ, लखनऊमा ८९०.५० रुपियाँ, अहमदाबादमा ८६० रुपियाँ, हैदराबादमा ९०५ रुपियाँ, वाराणसीमा ९१६.५० रुपियाँ र पट्नामा ९५१ रुपियाँ कायम रहेको छ।
हिन्दुस्थान समाचार / भवानी थामी
