नवी दिल्ली, 12 नोव्हेंबर (हिं.स.) : वर्ष 2021 मधील 69 व्या राष्ट्रीय चित्रपट पुरस्कार विजेत्या चित्रपटांचे बहुप्रतीक्षित पब्लिक स्क्रीनिंग (सर्वसामान्यांसाठी चित्रपट पाहण्याची सुविधा) 14 ते 25 नोव्हेंबर 2023 दरम्यान दिल्लीतील प्रेक्षकांसाठी होणार आहे. सिरी फोर्ट ऑडिटोरियम II येथे आयोजित या बारा दिवसांच्या प्रदर्शना दरम्यान, 18 भाषांमधील 30 चित्रपट आणि 27 नॉन-फीचर फिल्म्स दाखवले जातील.
या पब्लिक स्क्रीनिंगमध्ये, 69 व्या राष्ट्रीय चित्रपट पुरस्कारांनी सन्मानित झालेले सर्वात उत्कृष्ट आणि उल्लेखनीय चित्रपटांची मेजवानी असेल. ज्युरींनी या चित्रपटांची निवड केलेली असून त्यांनी या चित्रपटांना सर्वोत्कृष्ट चित्रपट, सर्वोत्कृष्ट अभिनेता, सर्वोत्कृष्ट अभिनेत्री, सर्वोत्कृष्ट दिग्दर्शन आणि इतर बर्याच श्रेणींमध्ये उत्कृष्ट कामगिरीसाठी नावाजलेले आहे. या पब्लिक स्क्रिनिंग च्या माध्यमातून प्रेक्षकांना भारतीय कथाकथन आणि सिनेमॅटिक उत्कृष्टतेची समृद्ध परंपरा पाहण्याची एक अतुलनीय संधी मिळणार आहे.
या सर्व चित्रपटांना इंग्रजी सबटायटल्स असतील. या पब्लिक स्क्रीनिंगसाठी, वैध फोटो ओळख पत्रासह येणाऱ्याला, प्रथम येणाऱ्यास प्राधान्य या तत्त्वावर गेट क्रमांक 5 मधून विनामूल्य प्रवेश दिला जाईल.
हिंदुस्थान समाचार
