નવી દિલ્હી, 25 નવેમ્બર (હિં. સ.) ઇન્ડિયન પ્રીમિયર લીગ (આઈપીએલ) ટાઇટલ માટે ગુજરાત ટાઇટન્સનું નેતૃત્વ કરનાર હાર્દિક પંડ્યા, મુંબઇ ઇન્ડિયન્સમાં પાછા ફરવા માટે તૈયાર છે. જ્યાં તેણે 2015 માં તેની આઈપીએલ કારકિર્દીની શરૂઆત કરી હતી.
ઈએસપીક્રિકઇન્ફૉના જણાવ્યા અનુસાર, આ સોદો એક સંપૂર્ણ રોકડ સોદો કરવામાં આવ્યો છે. જેમાં મુંબઈએ હાર્દિકના પગાર તરીકે રૂ. 15 કરોડ (લગભગ 1.8 મિલિયન ડોલર) ચૂકવ્યા છે અને ટાઇટન્સને અઘોષિત ટ્રાન્સફર ફી ચૂકવવાની રહેશે. હાર્દિકને ટ્રાન્સફર ફીના 50% સુધીનો લાભ મળશે.
જો આ ડીલ થશે તો, આઈપીએલના ઈતિહાસમાં, કદાચ આ સૌથી મોટી પ્લેયર ડીલ હશે. જોકે, બંનેમાંથી કોઈ પણ ફ્રેન્ચાઈઝીએ હજુ સુધી, આ ટ્રેડ અંગે કોઈ જાહેર ટિપ્પણી કરી નથી. મુંબઈ માટે સૌથી મોટો પડકાર ટ્રેડ માટે પૂરતા ભંડોળ રાખવાનો છે. છેલ્લી હરાજી પછી, મુંબઈ પાસે માત્ર 0.05 કરોડ રૂપિયા (લગભગ 6000 ડોલર) બચ્યા હતા.
ફ્રેન્ચાઇઝીને આગામી હરાજી માટે, તેના પર્સમાં વધારાના રૂ.5 કરોડ (લગભગ 600,000 ડોલર) મળશે. આનો અર્થ એ છે કે, મુંબઈએ હાર્દિકના ટ્રેર્ડને સમાપ્ત કરવા માટે, ખેલાડીઓને મુક્ત કરવાની જરૂર છે. જાળવણીની સમયમર્યાદા 26 નવેમ્બરે સાંજે 4 વાગ્યે સમાપ્ત થાય છે.
હાર્દિકે 2022માં ટાઇટન્સનું નેતૃત્વ કર્યું હતું. જે આઈપીએલ માં તેની પ્રથમ સિઝન હતી, અને રાજસ્થાન રોયલ્સ સામેની ફાઇનલમાં તે પ્લેયર ઓફ ધ મેચ હતો. 2023માં, ટાઇટન્સે બે સિઝનમાં બીજી વખત આઈપીએલની ફાઇનલમાં જગ્યા બનાવી હતી. જ્યાં તેઓ ચેન્નાઇ સુપર કિંગ્સ સામે હારી ગયા. હાર્દિકના નેતૃત્વમાં ટાઇટન્સ બંને સિઝનમાં, લીગ સ્ટેજમાં પોઈન્ટ ટેબલમાં ટોચ પર હતી.
ટાઇટન્સ સાથેના તેના બે સિઝનના કાર્યકાળમાં, હાર્દિકે 30 ઇનિંગ્સમાં 41.65ની સરેરાશ અને 133.49ની સ્ટ્રાઇક રેટથી 833 રન બનાવ્યા હતા. તેણે તેમના માટે 8.1ની ઇકોનોમીમાં 11 વિકેટ લીધી હતી. હાર્દિક હાલમાં ઈજાગ્રસ્ત છે. તેને ભારતના વન ડે વર્લ્ડ કપ અભિયાન દરમિયાન પગની ઘૂંટીમાં ઈજા થઈ હતી.
જો આ ટ્રેડ થાય છે, તો આર અશ્વિનના પંજાબ કિંગ્સમાંથી દિલ્હી કેપિટલ્સમાં ટ્રાન્સફર થયા બાદ, હાર્દિક ત્રીજો કેપ્ટન બનશે. 2020 માં, રાજસ્થાન રોયલ્સે પણ અજિંક્ય રહાણેને કેપિટલ્સમાં ટ્રેડ કર્યો હતો.
જ્યારે ગ્લોબલ ફંડ મેનેજર સીવીસી કેપિટલ પાર્ટનર્સ દ્વારા માલિકીની ટાઇટન્સ ફ્રેન્ચાઇઝી 2021માં અસ્તિત્વમાં આવી, ત્યારે તેમને મેગા ઓક્શન પહેલા અન્ય ફ્રેન્ચાઇઝીસ દ્વારા બહાર પાડવામાં આવેલા પૂલમાંથી ત્રણ ખેલાડીઓને પસંદ કરવાની મંજૂરી આપવામાં આવી હતી. ટાઇટન્સે હાર્દિક અને અફઘાનિસ્તાનના ઓલરાઉન્ડર રાશિદ ખાનને રૂ. 15 કરોડમાં સાઇન કર્યા હતા. જ્યારે શુભમન ગિલ રૂ. 7 કરોડમાં ત્રીજી વખત પસંદ થયો હતો.
આ મુંબઈ હતું, જ્યાં હાર્દિકે તેની આઈપીએલ કારકિર્દીની શરૂઆત કરી અને તે રમતના શ્રેષ્ઠ ઓલરાઉન્ડરોમાંનો એક બન્યો. 2015માં અનકેપ્ડ પ્લેયર તરીકે, 10 લાખ રૂપિયામાં ખરીદાયેલ હાર્દિક, 2015, 2017, 2019 અને 2020 માં મુંબઈની ટાઈટલ વિજેતા સીઝનનો ભાગ હતો.
2021 સુધીની દરેક હરાજી પહેલા મુંબઈ દ્વારા જાળવી રાખ્યા પછી, હાર્દિકને આખરે 2022 ની મેગા ઓક્શન પહેલા મુક્ત કરવામાં આવ્યો. જે એક આશ્ચર્યજનક નિર્ણય હતો. મુંબઈને તે વર્ષે માત્ર ચાર ખેલાડીઓ જ, રાખવાની મંજૂરી આપવામાં આવી હતી અને તેણે રોહિત શર્મા, જસપ્રિત બુમરાહ, સૂર્યકુમાર યાદવ અને કિરોન પોલાર્ડને રાખવાનો નિર્ણય કર્યો હતો. જેનાથી ટાઇટન્સ માટે, હાર્દિકને તેમના કેપ્ટન તરીકે સાઇન કરવાનો માર્ગ મોકળો થયો હતો.
હિન્દુસ્થાન સમાચાર / સુનીલ / ડો હિતેશ
