নতুন দিল্লী, ২৭ ফেব্ৰুৱাৰী : হকী ইণ্ডিয়াৰ দীৰ্ঘদিন ধৰি মুখ্য কাৰ্যবাহী বিষয়াৰূপে সেৱাৰত এলেনা নৰ্মানে মঙলবাৰে পদৰ পৰা পদত্যাগ কৰে। প্ৰায় ১৩ বছৰ ধৰি তেওঁ এই পদত অধিষ্ঠিত হৈ আছিল।
শীৰ্ষত থকা সময়ছোৱাত ভাৰতীয় পুৰুষ আৰু মহিলা হকী দলে কেৰিয়াৰৰ শ্ৰেষ্ঠ বিশ্ব ৰেংকিঙৰ লগতে টকিঅ’ অলিম্পিক গেমছত এক ঐতিহাসিক কৃতিত্ব অৰ্জন কৰাৰ লগতে ৪১ বছৰীয়া পদকবিহীন সময়ৰ অন্ত পেলাই ভাৰতীয় পুৰুষে ব্ৰঞ্জৰ পদক লাভ কৰিছিল। আনহাতে মহিলাসকলে অভূতপূৰ্ব চতুৰ্থ স্থান দখল কৰে।
তেওঁৰ নেতৃত্বত ফেডাৰেচনে ২০১৮ আৰু ২০২৩ চনত এফ আই এইচ পুৰুষ হকী বিশ্বকাপৰ একেৰাহে দুটা সংস্কৰণ আয়োজন কৰিছিল, ২০১৬ আৰু ২০২১ চনত দুটাকৈ এফ আই এইচ জুনিয়ৰ পুৰুষৰ বিশ্বকাপ আয়োজন কৰিছিল আৰু লগতে হকী ইণ্ডিয়া লীগৰ পাঁচটা সংস্কৰণো সফলতাৰে আয়োজন কৰিছিল, যিটো ফ্ৰেঞ্চাইজি- ভিত্তিক লীগে জনপ্ৰিয়তা লাভ কৰাৰ লগতে ভাৰতীয় পুৰুষ হকী দলৰ প্ৰদৰ্শন উন্নত কৰিছিল আৰু যুৱক-যুৱতীসকলে বিশ্বৰ কিছুমান সন্মানীয় হকী তাৰকাৰ সৈতে কান্ধ মিলাই দিয়াৰ সুযোগ পাইছিল।
তেওঁৰ কাৰ্যকালত হকী ইণ্ডিয়াই এফ আই এইচ চেম্পিয়নছ ট্ৰফী, ২০১৫ আৰু ২০১৭ চনত এফ আই এইচ ৱৰ্ল্ড লীগ ফাইনেল, ২০১৯ আৰু ২০২৪ চনত এফ আই এইচ অলিম্পিক কোৱালিফায়াৰৰ লগতে এফ আই এইচ হকী প্ৰ’ লীগৰ ঘৰুৱা খেলসমূহকে ধৰি কেইবাটাও আন্তঃৰাষ্ট্ৰীয় হকী ইভেণ্ট আয়োজন কৰিছিল।
মহিলা হকীক লাইমলাইটলৈ অনাৰ ক্ষেত্ৰতো এলিনাই আগৰণুৱা আছিল, তেওঁলোকক পুৰুষৰ হকী দলৰ দৰেই সুবিধা প্ৰদান কৰিছিল, য’ত হকী ইণ্ডিয়া বাৰ্ষিক বঁটাৰ জৰিয়তে আন্তঃৰাষ্ট্ৰীয় অনুষ্ঠানত অসাধাৰণ প্ৰদৰ্শনক স্বীকৃতি দিয়া নগদ পুৰস্কাৰো আছিল।
বিশেষকৈ ২০১৬ চনৰ ৰিঅ’ অলিম্পিকৰ বাবে মহিলা দলটোৱে যোগ্যতা অৰ্জন কৰাত তেওঁৰ ভূমিকা আছিল, যিটো ঐতিহাসিক কৃতিত্ব কাৰণ দলটোৱে প্ৰথমবাৰৰ বাবে যোগ্যতা অৰ্জন কৰিছিল আৰু ৩৬ বছৰৰ পাছত অলিম্পিকত অংশগ্ৰহণ কৰিছিল।
২০১৯ চনত ভুৱনেশ্বৰত অনুষ্ঠিত অলিম্পিক কোৱালিফায়াৰৰ জৰিয়তেও দলটোৱে একেৰাহে অলিম্পিক কোটা স্থান লাভ কৰিছিল।
মুখ্য কাৰ্যবাহী বিষয়াগৰাকীয়ে ভাৰতীয় কাৰিকৰী আৰু মেচ বিষয়াসকলৰ বাবে বিভিন্ন পদক্ষেপৰ লগতে ঘৰুৱা প্ৰশিক্ষকসকলক বিশ্বব্যাপী প্ৰশিক্ষক অনুশীলনৰ সৈতে সজ্জিত কৰা হকী ইণ্ডিয়া কোচ এডুকেচন পাথৱেও মুকলি কৰে।
পদত্যাগ স্বীকাৰ কৰি হকী ইণ্ডিয়াৰ সভাপতি পদ্মশ্ৰী ড০ দিলীপ তিৰ্কীয়ে কয়, এলিনাৰ সময় আৰু নিষ্ঠাৰ বাবে মই কৃতজ্ঞতা জ্ঞাপন কৰিছো, কেৱল হকী ইণ্ডিয়াৰ সভাপতি হিচাপেই নহয়, এগৰাকী প্ৰাক্তন খেলুৱৈ আৰু হকী প্ৰেমী হিচাপেও যোৱা ১২-১৩ বছৰত তেওঁৰ উল্লেখযোগ্য অৱদানক মই আনুষ্ঠানিকভাৱে স্বীকাৰ কৰিছো আৰু মোৰ আন্তৰিক কৃতজ্ঞতা প্ৰকাশ কৰিছো। তেওঁৰ নিষ্ঠা আৰু প্ৰচেষ্টাই হকী ইণ্ডিয়া আৰু ভাৰতীয় হকীক আজিৰ প্ৰশংসনীয় অৱস্থালৈ অনাত এক গুৰুত্বপূৰ্ণ ভূমিকা পালন কৰিছে। মই তেওঁক মহান সফলতা কামনা কৰিছো আৰু ভৱিষ্যতৰ বাবে তেওঁক শুভকামনা জনাইছো।
