কোকৰাঝাৰ, ১১ ছেপ্টেম্বৰ (হি.স.): ‘‘আপোনাৰ এটা এটা ভোটে ভৱিষ্যত প্ৰজন্মক সুৰক্ষিত কৰিব ৷ নিজৰ সতি-সন্তানৰ সুৰক্ষিত ভৱিষ্যত গঢ়িবলৈ নিজৰ আত্মসন্মান আৰু বিবেকক বিক্ৰী নকৰিব ৷ বৰ্তমান সময়ত ৰাজনীতিৰ দুটা প্ৰচলিত ধাৰা টকা আৰু মিথ্যা প্ৰতিশ্ৰুতি ৷ যি দুটাৰ এটাও নাই অল্টাৰনেটিভ পাৰ্টি অব বডোলেণ্ড চমুকৈ এপিবিৰ ৷ যি ৰাজনৈতিক দলে কাকো মিথ্যা প্ৰতিশ্ৰুত নিদিয়ে ৷ যি টকাৰ দ্বাৰা ভোটাৰক কিনিব পাৰে ৷ লিডাৰক কিনিব পাৰে ৷ ৰাজনৈতিক দলবিলাকে অসম্ভৱ মিছা কথা ক’ব পাৰে ৷ কিন্তু এই দুটাৰ এটাও নাই ৷ টকাও নাই, মিছা কথা ক’বও নোৱাৰে ৷’’– এই ভাষ্য এপিবিৰ সভানেত্ৰী ড° অঞ্জলি দৈমাৰীৰ ৷ গোসাঁইগাঁও সদৰ চহৰৰ হাব্ৰুবিলস্থিত ইউ এন খেলপথাৰত আয়োজিত বিশাল সমাবেশত দলৰ মুৰব্বী দৈমাৰীয়ে বৃহস্পতিবাৰে এই মন্তব্য় কৰে ।
দৈমাৰীয়ে আৰু কয়, বডোলেণ্ড আন্দোলনৰ নামত আত্মবলিদান দিয়া সকলৰ ত্যাগক বিসৰ্জন দি বিজেপিৰ টকাৰে হেলিকপ্টাৰ উৰুৱাই জাতীয় চৰিত্ৰক বিসৰ্জন দিছে ৷ বিগত পাঁচটা বছৰে শাসনত বহা সকলে বিটিচিক বিক্ৰী কৰিছে ৷ পাঁচ বছৰত বিটিচিৰ ভৱিষ্যত অন্ধকাৰ কৰি পেলাইছে ৷ বড়ো সকলৰ স্বাভিমানক হত্যা কৰি কোনোবা বেলেগৰ ৰিমটেৰে চলাই আছে ৷ নিজৰ স্বতন্ত্ৰতা নোহোৱা কৰিছে ৷ গণতান্ত্ৰিক অধিকাৰক খৰ্ব কৰা হৈছে ৷ যি সকলে আত্মবলিদান দিলে সেই সকলৰ ত্যাগক ভুলুণ্ঠিত কৰা হ’ল ৷ যি সকলে জীয়াই আছে, সেই সকলৰ গোচৰ সমূহ নিষ্পত্তি কৰা নহ’ল৷ ৰাজ্য তথা বহিঃ ৰাজ্যত বহু গোচৰ চলি আছে ৷ সেই সকলৰ ভৱিষ্যত অনিশ্চিত ৷ কিন্তু যি সকলৰ বলিদানত বিটিআৰ পালে, সেই সকলৰ ত্যাগক অপমান কৰিলে ৷
বক্তব্যত কয়, এই চৰকাৰে ইচ্ছা কৰিলে নিজাকৈ নীতি বনাব পাৰিলেহেঁতেন ৷ কিন্তু তাকে নকৰি খিলঞ্জীয়াৰ ভুমি আম্বানি, আদানি আৰু ৰামদেৱৰ দৰে লোকক হাজাৰ হাজাৰ বিঘা মাটি দান কৰিছে ৷ যিটো সময়ত বিটিচিত বড়ো জনগোষ্ঠীৰ লোকেই আটাইতকৈ বেছি উচ্ছেদিত হৈছে ৷ এই ভুমিৰ স্থায়ী সমাধান নকৰিলে ৷ এতিয়া বিটিচিত দুশতকৈ অধিক গাঁও উচ্ছেদিত হ’ব ৷ এক ভৱানক পৰিস্থিতিৰ সৃষ্টি কৰিব বিচৰা চৰকাৰে ৷ ভুমিৰ নীতি, শিক্ষা স্বাস্থ্যৰ নীতি বনাব নোৱাৰিলে ৷ যি শাসন ব্যৱস্থাত বছৰত এদিন বহে অধিবেশন বহে ৷ গতিকে বছৰত এটা দিনত কোনো সিদ্ধান্ত গ্ৰহণ কৰিব নোৱাৰে ৷ এনেকি যি সকলে আত্মবলিদান দিলে ৷ সেই সকলক মৰ্যদা প্ৰদান কৰা হোৱা নাই ৷ যাৰ বাবে মাত্ৰ পাঁচ মহীয়া এটি দলক ভয় কৰিবলগীয়া হৈছে ৷ এই দলৰ প্ৰতি ৰাইজৰ সহায়, বিশ্বাস জন্মিছে ৷
দৈমাৰীয়ে বক্তব্যত আৰু কয়, এই এপিবি এটা আন্দোলন ৷ এই আন্দোলন ৰাজনৈতিক আন্দোলন ৷ এই আন্দোলন ৰাজপথত নহয়, ৰে’ল লাইনত নহয়, সকলো জাতি জনগোষ্ঠীৰ লোকক সম অধিকাৰ, সম মৰ্যদা, সম বিকাশ প্ৰদানৰ আন্দোলন ৷ এই আনোলনত সকলো জাতি জনগোষ্ঠীৰ লোকে একেলগে, একেশাৰীত বহি একেলগে কথাপাতি সমস্যাৰ সমাধান কৰিব লাগিব ৷ আদিবাসী, মুছলিম সকলো জাতি জনগোষ্ঠীৰ কি সমস্যা একেলগে বহি আলোচনাৰ মাজেৰে সমাধান কৰিব লাগিব ৷ নিৰ্বাচনী বতৰত সভানেত্ৰী গৰাকীয়ে কয়, যোৱা ২০২০ চনত ইউপিপিএল দলে কিমান প্ৰতিশ্ৰুতি দিছিল এটাও পুৰন কৰিব নোৱাৰিলে ৷ এটা ভোট এটা চাকৰি ৷ দিব পাৰিলে জানো ৷ শিক্ষা সাহিত্য সংস্কৃতি, মহিলা সকলৰ উন্নতি কাৰণে পৃথিৱীৰ ডাঙৰ দেশ বিলাকেও ঘৰে ঘৰে চাকৰি দিব নোৱাৰে ৷ চৰকাৰৰ ১২ শ টকা আৰু ফ্ৰি চাউলেৰে মানুহ কেতিয়াও ধনী নহয় ৷ চৰকাৰে ৰাইজক ধনী হোৱাৰ কাৰণে টকা দিয়া নাই ৷ পৰনিৰ্ভৰশীল কৰিবলৈ চেষ্টা কৰি আছে ৷ পৰমুখাপেক্ষী বনাইছে ৷ মহিলাক ভোট বেংক হিচাপে ব্যৱহাৰ কৰি আছে ৷ টকা বাবে আত্ম সন্মান বজাই ৰাখিব লাগে ৷ টকাৰ বাবে নিজৰ বিবেকক বিক্ৰী কৰিব নালাগে বুলিও ৰাইজক উদ্দেশ্যি বক্তব্য প্ৰদান কৰি এপিবিৰ প্ৰাৰ্থীক জয়ী কৰাই বিটিচিত সুস্থ, সমৃদ্ধিশালী আৰু প্ৰগতিশীল চৰকাৰ গঠনত সহায় সহযোগ কৰিবলৈ আহ্বান জনায় ৷
সভাত জিলাখনৰ আঠ গৰাকী মনোনীত প্ৰাৰ্থীয়ে উপস্থিত থাকে ৷ নিৰ্বাচনী প্ৰচাৰ সভাত কেইবা সহস্ৰাধিক লোক উপস্থিত থাকে৷
হিন্দুস্থান সমাচাৰ / কিশোৰ মিশ্ৰ
