নতুন দিল্লী, ১৬ অক্টোবৰ (হি.স.)। প্ৰধানমন্ত্ৰী নৰেন্দ্ৰ মোদীয়ে কাইলৈ মঙলবাৰে পুৱা প্ৰায় ১০:৩০ বজাত ভিডিঅ’ কনফাৰেন্সিঙৰ জৰিয়তে গ্ল’বেল মেৰিটাইম ইণ্ডিয়া ছামিট(জিএমআইএছ) ২০২৩ৰ তৃতীয় সংস্কৰণ উদ্বোধন কৰিব।
এই সন্মিলন ১৭ অক্টোবৰৰ পৰা ১৯ অক্টোবৰলৈ মুম্বাইৰ এমএমআৰডিএ খেলপথাৰত অনুষ্ঠিত হ’ব । তিনিদিনীয়া এই সন্মিলনত বন্দৰসমূহৰ ভৱিষ্যতকে ধৰি সামুদ্ৰিক খণ্ডৰ মূল বিষয়সমূহৰ ওপৰত চৰ্চা আৰু আলোচনা কৰা হ’ব। এই সন্মিলনে দেশৰ সামুদ্ৰিক খণ্ডত বিনিয়োগ আকৰ্ষণ কৰিবলৈও এক উৎকৃষ্ট মঞ্চ প্ৰদান কৰিব।
এই অনুষ্ঠানৰ সময়ত প্ৰধানমন্ত্ৰীয়ে ভাৰতৰ সামুদ্ৰিক ‘নীলা’ অৰ্থনীতিৰ দীৰ্ঘম্যাদী খচৰা ‘অমৃত কাল ভিজন ২০৪৭’ উন্মোচন কৰিব। এই ভৱিষ্যৎৰ পৰিকল্পনা অনুসৰি প্ৰধানমন্ত্ৰীয়ে উদ্বোধন কৰিব, ৰাষ্ট্ৰৰ প্ৰতি উৎসৰ্গা কৰিব আৰু ২৩ হাজাৰ কোটিতকৈও অধিক মূল্যৰ প্ৰকল্পৰ আধাৰশিলা স্থাপন কৰিব।
এই সন্মিলনখন দেশৰ ভিতৰতে সৰ্ববৃহৎ সামুদ্ৰিক অনুষ্ঠান। ইয়াত ইউৰোপ, আফ্ৰিকা, দক্ষিণ আমেৰিকা, এছিয়া (মধ্য এছিয়া, মধ্যপ্ৰাচ্য আৰু বিমষ্টেক অঞ্চলকে ধৰি) দেশসমূহক প্ৰতিনিধিত্ব কৰা বিশ্বৰ বিভিন্ন প্ৰান্তৰ মন্ত্ৰীসকলে অংশগ্ৰহণ কৰিব। এই সন্মিলনত বিশ্বৰ বিভিন্ন প্ৰান্তৰ বিশ্বৰ মুখ্য কাৰ্যবাহী বিষয়া, ব্যৱসায়িক নেতা, বিনিয়োগকাৰী, কাৰ্যবাহী আৰু অন্যান্য অংশীদাৰসকলেও অংশগ্ৰহণ কৰিব। ইয়াৰ উপৰিও ভাৰতৰ কেইবাখনো ৰাজ্যৰ মন্ত্ৰী আৰু অন্যান্য গণ্যমান্য ব্যক্তিয়ে এই সন্মিলনত প্ৰতিনিধিত্ব কৰিব ।
গুজৰাটৰ দীনদয়াল বন্দৰ কৰ্তৃপক্ষৰ টুনা টেকৰা অল ৱেদাৰ ডিপ ড্ৰাফ্ট টাৰ্মিনেলৰ আধাৰশিলা স্থাপন কৰিব প্ৰধানমন্ত্ৰীয়ে। এই অত্যাধুনিক গ্ৰীণফিল্ড টাৰ্মিনেলটো পিপিপি মোডত বিকশিত কৰা হ’ব। এই টাৰ্মিনেলটো আন্তঃৰাষ্ট্ৰীয় বাণিজ্যৰ কেন্দ্ৰ হিচাপে আত্মপ্ৰকাশ কৰাৰ সম্ভাৱনা আছে। ই ১৮,০০০ৰো অধিক বিশ ফুট সমতুল্য ইউনিট (টিইইউ)ৰ পৰৱৰ্তী প্ৰজন্মৰ জাহাজ পৰিচালনা কৰিব আৰু ভাৰত-মধ্যপ্ৰাচ্য-ইউৰোপ অৰ্থনৈতিক কৰিডৰ (আইএমইইচি)ৰ জৰিয়তে ভাৰতীয় বাণিজ্যৰ বাবে প্ৰৱেশদ্বাৰ হিচাপে কাম কৰিব। এই অনুষ্ঠানৰ সময়ত প্ৰধানমন্ত্ৰীয়ে সামুদ্ৰিক খণ্ডত বিশ্বব্যাপী আৰু ৰাষ্ট্ৰীয় অংশীদাৰিত্বৰ বাবেও ৭ লাখ কোটিতকৈ অধিক মূল্যৰ ৩০০ৰো অধিক বুজাবুজি স্মাৰক উচৰ্গা কৰিব।
উল্লেখযোগ্য যে ২০১৬ চনত মুম্বাইত প্ৰথম সামুদ্ৰিক ভাৰত সন্মিলন অনুষ্ঠিত হৈছিল। ২০২১ চনত ভাৰ্চুৱেলভাৱে অনুষ্ঠিত হৈছিল দ্বিতীয়খন সামুদ্ৰিক সন্মিলন।
হিন্দুস্থান সমাচাৰ/অনুপ/মনোজ/অৰবিন্দ
