ইছলামাবাদ, ০৬ আগষ্ট (হি.স.)। নিষিদ্ধ তেহৰিক-ই-তালিবান পাকিস্তানে নিৰাপত্তাৰক্ষীৰ বিৰুদ্ধে সশস্ত্ৰ সংগ্ৰামত সাধাৰণ নাগৰিকক মানৱ ঢাল হিচাপে ব্যৱহাৰ নকৰে বুলি মঙলবাৰে সন্মতি প্ৰকাশ কৰে। খাইবেৰ জনজাতি জিলাৰ অশান্ত তিৰাহ উপত্যকাত এতিয়াৰ পৰা জাকাত আৰু উছৰৰ নামত কোনো ধৰণৰ ধন দাবী কৰা নহ’ব বুলিও প্ৰতিশ্ৰুতি দিয়ে টিটিপিৰ নেতাসকলে।
ডন কাকতৰ প্ৰতিবেদন অনুসৰি টিটিপিৰ লেটাৰহেডত পস্তো ভাষাত লিখা আৰু ইয়াৰ উচ্চতম পৰিষদৰ (ৰহবাৰী শ্বুৰা) মোহৰ থকা এই চুক্তিখন বৰ কাম্বাৰখেলৰ এজন বয়োজ্যেষ্ঠই স্থানীয় জনজাতিসকলৰ সন্মুখত পঢ়ি শুনাইছিল। সাধাৰণ জনজাতিৰ লোকসকলৰ বিৰুদ্ধে শত্ৰুতা শেষ কৰি শান্তি পুনৰুদ্ধাৰৰ বাবে তিৰাহৰ পৰা আঁতৰি আহিবলৈ তেওঁলোকৰ দাবীৰ প্ৰতি সঁহাৰি জনাই এই চুক্তি কৰা হৈছে। এই চুক্তিখন মঙলবাৰে খৈবাৰৰ তিৰাত বৰ কামাম্বৰখেল জনগোষ্ঠীৰ জিকগাৰ সময়ত হয়।
এই সময়ত নিষিদ্ধ টিটিপিৰ নেতাসকলে নিৰাপত্তাৰক্ষীৰ বিৰুদ্ধে সশস্ত্ৰ প্ৰতিৰোধ অব্যাহত ৰখাৰ লগতে নিৰাপত্তা বাহিনীক সমৰ্থন কৰা বা তেওঁলোকৰ বিৰুদ্ধে চোৰাংচোৱাগিৰি কৰাৰ দোষী সাব্যস্ত হোৱাসকলক শাস্তি দিয়াৰ প্ৰতিশ্ৰুতি দিয়ে। চুক্তিখনত উল্লেখ আছে যে আমাৰ একমাত্ৰ উদ্দেশ্য হৈছে ইছলাম বিৰোধী শক্তি আৰু তেওঁলোকৰ মিত্ৰশক্তিৰ বিৰুদ্ধে সশস্ত্ৰ সংগ্ৰাম (জেহাদ)। আমি স্থানীয় জনসাধাৰণৰ আভ্যন্তৰীণ আৰু ব্যক্তিগত কাম-কাজৰ লগত জড়িত হোৱাটো অনুচিত বুলি গণ্য কৰোঁ আৰু সেয়েহে আমি আমাৰ স্বেচ্ছাসেৱকসকলক তেনে কৰাত কঠোৰভাৱে নিষেধাজ্ঞা আৰোপ কৰিছো।
চুক্তিখনত স্পষ্ট কৰি দিয়া হৈছে যে টিটিপিৰ সদস্যসকলে মানুহৰ ঘৰত আশ্ৰয় ল’ব নোৱাৰিব বা নিৰাপত্তাৰক্ষীৰ বিৰুদ্ধে বাংকাৰ হিচাপে ব্যৱহাৰ নকৰিব, কিন্তু তেনে কোনো ব্যক্তিগত ভৱনত নিৰাপত্তা বাহিনী ৰখাৰ বিৰোধিতা কৰিব। যোদ্ধাসকলে কাকো অপহৰণ বা হাৰাশাস্তি নকৰে বুলিও টিটিপি নেতাসকলে একমত প্ৰকাশ কৰে।
২৮ জুলাইত তিৰাৰ বৰ কামাম্বৰখেলত প্ৰথম ৰাউণ্ডৰ আলোচনা অনুষ্ঠিত হয়। এই সময়ছোৱাত টিটিপিৰ স্থানীয় সেনাপতিসকলে আফগানিস্তানত থকা তেওঁলোকৰ নেতৃত্বৰ ওচৰত জিৰ্গাৰ দাবীসমূহ জনোৱাৰ বাবে ৫ আগষ্টলৈকে সময় বিচাৰিছিল। এই চুক্তিৰ শলাগ লৈছে তিৰাৰ অধিকাংশ বাসিন্দাই।
हिन्दुस्थान समाचार / মনোজ কুমাৰ শইকীয়া
