ঢাকা, ২৩ ডিচেম্বৰ (হি.স.)। বাংলাদেশৰ অন্তৱৰ্তীকালীন চৰকাৰে আজি ঢাকাত ভাৰতীয় উচ্চায়ুক্ত প্ৰণয় ভাৰ্মাক মাতি আনি শেহতীয়া পৰিঘটনাক লৈ গভীৰ উদ্বেগ প্ৰকাশ কৰে বুলি বৈদেশিক মন্ত্ৰালয়ৰ এক বিবৃতিত প্ৰকাশ পাইছে। যোৱা ১০ দিনত এইবাৰ দ্বিতীয়বাৰৰ বাবে ভাৰতীয় উচ্চায়ুক্তক চমন কৰা হৈছে। ইফালে, দিল্লীত থকা বাংলাদেশী মিছনত ভিছা সেৱা বন্ধ কৰাৰ কথা ঘোষণা কৰিছে ঢাকাই।
আজি বিয়লি প্ৰথম আলো কাকতত এই কথা প্ৰকাশ পাইছে। বৈদেশিক মন্ত্ৰালয়ৰ সূত্ৰৰ উদ্ধৃতি দি কাকতখনে কয় যে বৰ্মাক পুৱা ১০ বজাত মাতি অনা হৈছিল আৰু মন্ত্ৰালয়ত বৈদেশিক সচিব আছাদ আলম ছিয়েমৰ সৈতে সাক্ষাৎ কৰা হৈছিল। যোৱা ১০ দিনত এইবাৰ দ্বিতীয়বাৰৰ বাবে ভাৰতীয় উচ্চায়ুক্তক চমন কৰা হৈছে। অন্তৱৰ্তীকালীন চৰকাৰৰ কাৰ্যকালত ভাৰতৰ ৰাষ্ট্ৰদূতগৰাকীক কমেও ছয়বাৰকৈ বিভিন্ন বিষয়ত মাতি অনা হৈছে।
বৈদেশিক পৰিক্ৰমা মন্ত্ৰালয়ৰ তথ্য অনুসৰি ২০ ডিচেম্বৰত নতুন দিল্লীত বাংলাদেশ উচ্চায়ুক্ত আৰু উচ্চায়ুক্তৰ বাসগৃহৰ বাহিৰত সংঘটিত হোৱা দুৰ্ভাগ্যজনক ঘটনাৰ লগতে যোৱা ২২ ডিচেম্বৰত শিলিগুৰিস্থিত বাংলাদেশৰ ভিছা কেন্দ্ৰত সংঘটিত লণ্ড ভণ্ড ঘটনাক লৈ বাংলাদেশে উদ্বেগ প্ৰকাশ কৰে। বাংলাদেশে এই ঘটনাক তীব্ৰ গৰিহণা দিয়ে।
প্ৰতিবেদন অনুসৰি বাংলাদেশে ভাৰত চৰকাৰক এই ঘটনাসমূহৰ তদন্ত কৰিবলৈ আৰু ইয়াৰ পুনৰাবৃত্তি ৰোধৰ বাবে প্ৰয়োজনীয় সকলো পদক্ষেপ ল’বলৈ আহ্বান জনাইছে। ইয়াৰ উপৰিও বাংলাদেশৰ কূটনৈতিক মিছন আৰু আনুষংগিক প্ৰতিষ্ঠানসমূহৰ নিৰাপত্তা সুনিশ্চিত কৰিবলৈ ভাৰতক আহ্বান জনায়। বিবৃতিটোত কোৱা হৈছে যে বাংলাদেশে ভাৰত চৰকাৰে নিজৰ আন্তঃৰাষ্ট্ৰীয় কূটনৈতিক বাধ্যবাধকতা অনুসৰি, কূটনৈতিক কৰ্মী আৰু চৌহদৰ মৰ্যাদা আৰু নিৰাপত্তা নিশ্চিত কৰাৰ বাবে তৎকালীন আৰু উপযুক্ত ব্যৱস্থা গ্ৰহণ কৰিব বুলি আশা কৰিছে।
প্ৰথম আলোৰ এক প্ৰতিবেদন অনুসৰি ইতিমধ্যে ঢাকাই দিল্লীৰ বাংলাদেশ উচ্চায়ুক্ত আৰু আগৰতলাৰ সহকাৰী উচ্চায়ুক্তত ভিছা আৰু কনছুলাৰ সেৱা বন্ধ কৰি দিছে। দুয়োটা মিছনে পৃথক জাননীৰ জৰিয়তে এই কথা ঘোষণা কৰিছে। দিল্লীত ভিছা সেৱা বন্ধ কৰাৰ সন্দৰ্ভত সোধাত বাংলাদেশৰ বৈদেশিক মন্ত্ৰালয়ৰ জ্যেষ্ঠ বিষয়াসকলে কয় যে শনিবাৰে নিশা উচ্চায়ুক্তৰ বাহিৰত প্ৰতিবাদৰ পিছতে এই সিদ্ধান্ত লোৱা হৈছে।
हिन्दुस्थान समाचार / অৰৱিন্দ
