ورلڈ کپ: ہاردک پانڈیا کی انجری کی صورتحال واضح ہونے میں ایک دن اور
نئی دہلی، 20 اکتوبر (ہ س)۔ ہندوستانی ٹیم کو آل راؤنڈر ہاردک پانڈیا کی انجری کی صورتحال واضح ہونے کے لیے کم از کم ایک دن مزید انتظار کرنا پڑے گا۔ ہاردک کا بایاں ٹخنہ مڑ گیا اور وہ جمعرات (19 اکتوبر) کو پونے میں بنگلہ دیش کی اننگز میں صرف تین گیندیں کر سکے۔
یہ چوٹ میچ کے نویں اوور اور ہاردک کے پہلے اوور کے دوران لگی، جب انہوں نے فالو تھرو پر اپنے پاوں سے گیند کو روکنے کی کوشش کی۔ وہ سپورٹ اسٹاف کے ساتھ لڑکھڑاتے ہوئے میدان سے باہر چلے گئے اور آخر کار وراٹ کوہلی نے اوور مکمل کیا۔
بورڈ آف کنٹرول فار کرکٹ ان انڈیا (بی سی سی آئی) نے اعلان کیا تھا کہ پانڈیا اسکین کے لیے گئے تھے، اور نتائج زیر التواء ہیں۔
کرکبز کے مطابق، اسکین رپورٹ ممبئی کے ایک ماہر کو بھیجی جا رہی ہے، اور ممبئی کے ڈاکٹر کے جائزے کی بنیاد پر آگے کی کارروائی طے کی جائے گی۔
اسکین کروانے کے بعد پانڈیا میدان میں واپس آئے۔ سمجھا جاتا ہے کہ ضرورت پڑنے پر انہیں بلے بازی کے لیے بھیجا جا سکتا تھا، حالانکہ اس کی کوئی ضرورت نہیں پڑی۔ بھارت نے بنگلہ دیش کی طرف سے دیا گیا 257 رنوں کا ہدف باآسانی حاصل کر لیا اور میچ سات وکٹوں سے جیت لیا۔
میچ کے بعد روہت شرما نے چوٹ کی شدت کو کم کرتے ہوئے کہا، ’’انہیں تھوڑی تکلیف ہوئی ہے، فکر کی بڑی بات نہیں ہے۔ ہم کل صبح دیکھیں گے کہ وہ کیسا محسوس کر رہے ہیں اور پھر منصوبہ بنائیں گے کہ آگے کیسے بڑھنا ہے۔‘‘
ہندوستھان سماچار
/شہزاد
