مان کی دھماکہ خیز اننگز کی بدولت اربن رائزرز حیدرآباد نے انڈیا کیپٹلز کو 3 رنوں سے دی شکست
رانچی، 24 نومبر (ہ س)۔ جے ایس سی اے انٹرنیشنل کرکٹ اسٹیڈیم میں کھیلی جا رہی لیجنڈز لیگ کرکٹ (ایل ایل سی) کے پانچویں میچ میں جمعرات کو گرکیرت سنگھ مان کی 54 گیندوں پر 89 رنوں کی دھماکہ خیز اننگز کی بدولت اربن رائزرز حیدرآباد نے سنسنی خیز مقابلے میں انڈیا کیپٹلز کو تین رنوں سے شکست دے دی۔ اربن رائزرس حیدرآباد کی لیگ میں یہ دوسری جیت ہے۔
میچ میں کیپٹلز نے ٹاس جیت کر پہلے فیلڈنگ کا فیصلہ کیا جسے ان کے گیندبازوں نے معنی خیز سمجھا۔ حیدرآباد کے اوپنرز ڈیانا اسمتھ (3) اور مارٹن گپٹل (2) 10 رن کے مجموعی اسکور پر سستے میں پویلین لوٹ گئے۔
اس کے بعد خطرے کو بھانپتے ہوئے گرکیرت سنگھ مان اور کپتان سریش رینا نے تیسری وکٹ کے لیے 92 رنوں کی شراکت قائم کی اور اسکور کو 100 سے آگے لے گئے۔ سریش رینا نے 46 کے ذاتی اسکور پر اپنی وکٹ کے پی اپنا کو دی۔ لیکن مان اور نئے بلے باز پیٹر ٹریگو نے 65 رنوں کی شراکت سے ٹیم کو مضبوطی دی۔ 167 کے ٹیم اسکور پر مناف پٹیل نے مان کو آوٹ کر کے سنچری بنانے سے روک دیا۔
وہیں دوسری جانب ناٹ آوٹ ٹریگو نے جارحانہ بلے بازی جاری رکھی اور صرف 20 گیندوں پر 36 رن بنائے۔ اسٹورٹ بنی نے ایک رن جوڑا جبکہ ناٹ آوٹ یوگیش ناگر نے 6 رن بنائے۔ حیدرآباد نے 20 اوورز میں 5 وکٹ پر 189 رن بنائے۔ اسورو اڑانا نے سب سے زیادہ دو وکٹیں حاصل کیں۔
190 رنوں کے ہدف کے تعاقب میں اتری انڈیا کیپٹلز شروع سے ہی مشکلات کا شکار نظر آئی اور پہلے پاور پلے کے اختتام تک ٹیم کپتان گوتم گمبھیر (0)، ہاشم آملہ (5)، کرک ایڈوارڈز (11) اور بین نے ڈنک (5) کی وکٹ گنو دی۔
یہاں سے کیون پیٹرسن اور ریکارڈو پاویل نے پانچویں وکٹ کے لیے 72 رنوں کی شراکت بنا کر اپنی ٹیم میں واپسی کی۔ اس شراکت کا خاتمہ موفو نے پاویل (26) کو آوٹ کرکے اسکور کو پانچ وکٹوں پر 115 رنوں تک پہنچا دیا۔ پیٹرسن نے نئے بلے باز ایشلے نرس کے ساتھ 42 رنوں کی اہم شراکت داری کی اور ٹیم کو ہدف کے قریب لے گئے۔
چھ چھکوں اور چار چوکوں کی مدد سے 77 رنوں کی اننگز کھیلنے والے پیٹرسن جیسے ہی آوٹ ہوئے، کیپٹلز ایک بار پھر بیک فٹ پر نظر آئی۔ 157/6 کے اسکور کو آگے بڑھاتے ہوئے ایشلے نرس کی ناٹ آوٹ اننگز (25 گیندوں پر 41 رن) بھی کام نہ آ سکی اور مخالف گیند بازوں نے ٹیم کو 6 وکٹوں پر 186 رنوں تک محدود کر دیا۔ کرس پوفو نے سب سے زیادہ دو وکٹیں حاصل کیں۔
ہندوستھان سماچار
/شہزاد
