اینٹبے، 15 دسمبر (ہ س)۔
انٹرنیشنل کرکٹ کونسل (آئی سی سی) ٹی- 20 ویمنز ورلڈ کپ افریقی کوالیفائر میں جمعرات کو گروپ بی کے میچ میں یوگانڈا نے نائجیریا کو چھ وکٹوں سے شکست دے دی۔
اینٹبے کرکٹ اوول میں کھیلے گئے میچ میں نائیجیریا نے پہلے بلے بازی کرتے ہوئے مقررہ 20 اوورز میں 9 وکٹوں پر 63 رن بنائے۔ جواب میں یوگانڈا نے 15 اوورز میں 4 وکٹوں کے نقصان پر 66 رن بنائے اور 6 وکٹوں سے کامیابی حاصل کی۔
میچ کی بہترین کھلاڑی منتخب ہوئیں یوگانڈا کی کپتان کونسولیٹ اویکو نے میچ کے بعد کہا کہ یہ ایک خوبصورت جیت تھی کیونکہ وہ اب گروپ میں سرفہرست ہیں اور سیمی فائنل میں تنزانیہ کا مقابلہ کرنے کے لیے تیار ہیں۔
اویکو نے کہا، ’’ ہمیں تنزانیہ کے خلاف اپنی بہترین کارکردگی کا مظاہرہ کرنا ہوگا کیونکہ یہ میچ ہمارے لیے بہت معنی رکھتا ہے کیونکہ ہمارا ہدف ورلڈ کپ کے لیے کوالیفائی کرنا ہے۔‘‘
یوگانڈا کے ہیڈ کوچ لارینس سیسیماٹمبا نے سنہوا کو بتایا کہ وہ سیمی فائنل میں پہنچنے پر ٹیم کی جیت کی رفتار سے خوش ہیں۔
انہوں نے کہا کہ توجہ مرکوز رکھنا اور اپنے گیم پلان کو موثر طریقے سے انجام دینا ضروری ہے۔
اس کے علاوہ جمعرات کو نامیبیا نے ایک قریبی میچ میں روانڈا کو 11 رنوں سے شکست دی۔ روانڈا نے 20 اوورز میں 91/8 رن بنائے، لیکن نامیبیا اتنے ہی اوورز میں 102/7 اسکور کرنے میں کامیاب رہا۔
دوسرے سیمی فائنل میں نامیبیا کا مقابلہ زمبابوے سے ہوگا۔
ٹاپ دو ٹیمیں اگلے سال دبئی میں ہونے والے عالمی کوالیفائرز کے لیے کوالیفائی کریں گی۔ 2024 آئی سی سی ٹی- 20 ویمنز ورلڈ کپ بنگلہ دیش کی میزبانی میں ہونے والا ہے۔
ہندوستھان سماچار/
/عطاءاللہ
