نجی اسکولوں کی انتظامیہ کا جے کے بورڈ آف اسکول ایجوکیشن کے خلاف احتجاج
جموں،11 جنوری (ہ س)۔ جموں و کشمیر بورڈ آف اسکول ایجوکیشن کی طرف سے نجی اسکولوں کے طلبا کو ٹیگ کرنے کے خلاف جے کے بورڈ دفتر جموں کے سامنے شدید احتجاجی مظاہرہ کیا۔ نجی اسکولوں کے مالکان، انتظامیہ، اساتذہ، ڈرائیور وغیرہ کی جانب سے ان کو درپیش رکاوٹوں کو اجاگر کرنے کے لیے مشترکہ احتجاج کیا گیا۔ یہ احتجاجی مظاہرہ جے اینڈ کے پرائیویٹ اسکولز ایسوسی ایشن کے بینر تلے کیا گیا۔
احتجاج کرنے والے ارکان نے پلے کارڈ اٹھا رکھے تھے اور بینرز اٹھائے ہوئے تھے۔ اُنہوں نے بورڈ سے اپیل کی کہ وہ دسویں، گیارہویں اور بارہویں جماعت کے تمام طلبا کو اسی اسکول سے حاضر ہونے کی اجازت دیں جہاں سے وہ گزشتہ سیشن میں رجسٹرڈ ہوئے تھے۔ جے کے پی ایس اے کی مرکزی باڈی کے صدر اجے گپتا نے افسوس کا اظہار کیا کہ جے اینڈ کے بورڈ آف اسکول ایجوکیشن نے بورڈ کی کلاسوں کے طلبا کو قریبی سرکاری اسکولوں کے ساتھ ٹیگ کرنے کی ایک نئی مثال قائم کی ہے۔ تعلیمی سیشن کے قریب قریب جے کے بورڈ کے اس اقدام نے نہ صرف بورڈ کی کلاسوں کو مفلوج کر دیا ہے بلکہ کلاس اوّل تا آٹھویں جماعت کے لیے بھی پورے نظام کو ناکارہ بنا دیا ہے۔
انہوں نے مزید کہا کہ بورڈ آف اسکول ایجوکیشن نے ٹیگنگ کے حوالے سے ہونے والے اثرات کا حساب نہیں لگایا ہے۔ اراکین نے طلباء کی ٹیگنگ کے حوالے سے جموں و کشمیر بورڈ آف اسکول ایجوکیشن کے جاری کردہ حکم نامے کو فوری طور پر واپس لینے کا مطالبہ کیا۔ انہوں نے یہ دھمکی بھی دی کہ اگر حکومت نے پرائیویٹ اسکولوں کے خلاف اپنا متنازعہ حکم واپس نہیں لیا تو جموں و کشمیر کے کونے کونے میں اس قسم کے احتجاجی مظاہرے کئے جائیں گے۔
ہندوستھان سماچار
/شہزاد
