تمل ناڈو کے چار اضلاع میں سیلاب سے بگڑے حالات
چنئی، 19 دسمبر (ہ س)۔ تمل ناڈو کے چار اضلاع میں سیلاب کی وجہ سے حالات خراب ہو گئے ہیں۔ گزشتہ 24 گھنٹوں میں ہونے والی موسلادھار بارش نے جنوبی اضلاع تھوتھکوڈی، ترونیل ویلی، تینکاسی اور کنیا کماری میں بڑے پیمانے پر تباہی مچا ئی ہے۔ ان اضلاع میں بارش اور سیلاب کی وجہ سے نظام زندگی درہم برہم ہو کر رہ گیا ہے۔ لاکھوں لوگ گھروں میں محصور ہیں۔ سیکورٹی فورسز کی مدد سے بڑے پیمانے پر راحت اور بچاو آپریشن شروع کیا گیا ہے۔ یہ چار اضلاع تمل ناڈو کے باقی حصوں سے کٹے ہوئے ہیں۔
تمل ناڈو کے وزیر اعلیٰ ایم کے اسٹالن منگل کو وزیر اعظم نریندر مودی سے ملاقات کے لیے پیر کی رات نئی دہلی پہنچے۔ گورنر آر این روی نے منگل کو راج بھون میں دفاع اور مرکزی حکومت کے محکموں کے عہدیداروں کی ہنگامی میٹنگ بلائی ہے۔ حکام نے بتایا کہ پیر کی صبح تک 1,039 بچوں سمیت 7,434 افراد کو ریلیف کیمپوں میں بھیجا گیا ہے۔ کئی مقامات پر بجلی کی سپلائی بند کرنی پڑی ہے۔ موبائل ٹاور گرنے سے بعض مقامات پر نیٹ ورک درہم برہم ہو گیا ہے۔
ریاستی حکومت نے پیر کی دیر رات تک ہلاکتوں کے اعداد و شمار جاری نہیں کیے تھے۔ تاہم چاروں اضلاع میں ہزاروں ایکڑ پر کھڑی فصلیں زیر آب آگئی ہیں۔ سینکڑوں گاڑیاں بہہ گئیں۔ تھمیرا برن ندی میں طغیانی آگئی ہے۔ ہندوستانی بحریہ بھی راحت اور بچاو کے کاموں میں مصروف ہے۔ تمل ناڈو حکومت نے بھی فوج اور فضائیہ کی مدد طلب کی ہے۔
ہندوستھان سماچار
/شہزاد
