سیتامڑھی، 18 نومبر(ہ س)۔
بہار کے سیتامڑھی میں مبینہ طور پر زہریلی شراب پینے سے 6 لوگوں کی موت کی خبر ہے ۔ انتظامیہ کی جانب سے ابھی تک اس کی تصدیق نہیں کی گئی۔ بتایا جا رہا ہے کہ جمعرات کی شام تمام مرنے والے ایک ساتھ مہوین میں شراب پینے گئے تھے۔ جس کے بعد سب کی طبیعت خراب ہوگئی اور ایک ایک کر کے 6 لوگ مر گئے۔ متوفی کے دو رشتہ داروں نے لاشوں کی آخری ر سوما ت کر دی ہے جبکہ نرہ کلا گاؤں کے رہنے والے اودھیش یادو کا پوسٹ مارٹم کرایا گیا جس کے بعد ایس پی نے گاؤں والے کی موت کی تصدیق کی ہے۔
چھٹھ سے ایک دن پہلے پیش آنے والے اس واقعہ سے پورے گاؤں میں غم کا ماحول ہے۔ چھٹھ کے تہوار کے باوجود گاؤں میں ہر طرف خاموشی ہے۔ پولیس ٹیم پورے معاملے کی جانچ کر رہی ہے۔ گاؤں والوں کا شبہ ہے کہ زہریلی شراب پینے سے 6 کی موت ہوئی ہے۔ تہوار کے دوران ایک ساتھ اتنے لوگوں کی موت سے ضلع انتظامیہ میں خوف وہراس ہے۔ جن کے خاندان کے لوگ مر چکے ہیں ان کے اہل خانہ کچھ نہیں کہہ رہے۔
سیتامڑھی کے ایس پی منوج کمار تیواری کے مطابق ایک متوفی کی موت شراب پینے کی وجہ سے ہوئی۔ اس کی لاش کا پوسٹ مارٹم کیا جا رہا ہے۔ مزید دو متوفی کے لواحقین نے پولیس کے پہنچنے سے قبل لاشوں کو جلا دیا تھا۔ ہلاکتوں پر ضلعی پولیس انتظامیہ نے کارروائی کرتے ہوئے متعلقہ پولیس افسر اور متعلقہ چوکیدار کو معطل کر دیا ہے۔
کچھ مقامی ذرائع نے بتایا کہ جمعرات کی شام تمام متوفی مہوین میں ایک ساتھ بیٹھ کر شراب پی رہے تھے۔ زہریلی شراب سے ایک ایک کر کے سب کی طبیعت خراب ہونے لگی اور 6 کی موت ہو گئی۔ مرنے والوں کے ناموں میں رام بابو رائے، سولمن ٹول کے وکرم کمار ، سنتوش مہتو اور نارہار گاؤں کے روشن کمار، نارہا کلا کے اودھیش یادو، مہیش یادو شامل ہیں۔ متوفی باجپٹی تھانے کے سلیمان ٹول، بابو نرہر اور نرہر کلا گاؤں کے رہنے والے تھے۔
ہندوستھان سماچار/افضل
/عطاءاللہ
