اسلام آباد ۔
پاکستان میں شوال المکرم 1445 ہجری کا چاند نظر آگیا ہے، جس کے ساتھ ہی پورے پاکستان میں عیدالفطر کل 10 اپریل بروز بدھ منائی جائے گی۔ چاند دیکھنے کےلئے مرکزی رویت ہلال کمیٹی کا اجلاس اسلام آباد میں جبکہ زونل کمیٹیوں کے اجلاس پشاور، لاہور، کراچی اور کوئٹہ میں ہوئے، جہاں انہیں ملک کے مختلف حصوں سے چاند نظر آنے کی شہادتیں موصول ہوئیں۔
چاند کی رویت کا حتمی اعلان چیئرمین رویت ہلال کمیٹی عبدالخبیر آزاد نے پریس کانفرنس کرتے ہوئے کیا۔ پاکستان رویت ہلال کمیٹی کااجلاس وزارت مذہبی امور کوہسار کمپلیکس کی عمارت میں ہوا، مرکزی اجلاس کی صدارت چیئرمین رویت ہلال کمیٹی پاکستان مولانا عبدالخبیر آزاد نے کی جبکہ رویت ہلال کمیٹی ممبران، محکمہ موسمیات، سپارکو اور سائنس اینڈ ٹیکنالوجی حکام بھی اجلاس میں شریک ہوئے۔کراچی زونل رویت ہلال کمیٹی کا اجلاس مولانا محمد سلفی کی زیر صدارت محکمہ موسمیات کے دفتر میں ہوا، اجلاس میں اراکین کمیٹی، محکمہ موسمیات کے نمائندوں سمیت دیگر افراد شریک ہوئے۔
زونل کمیٹی کراچی کے اجلاس میں عید کے چاند کی شہادتوں کا جائزہ لیا گیا۔ زونل کمیٹی کے مطابق کراچی سے چاند نظر آنے کی کئی شہادتیں موصول ہوئی ہیں، تاہم چاند کی رویت سے متعلق حتمی اعلان مرکزی رویت ہلال کمیٹی کرے گی۔رکن زونل رویت ہلال کمیٹی مولانا محمد سلفی کا کہنا تھا کہ اب تک چاند نظر نہیں آیا، چاند کی شہادتوں کی اطلاعات ہیں، حتمی فیصلہ اسلام آباد سے ہوگا۔انہوں نے یہ بھی کہا تھا کہ جیسے ہی چاند نظر آیا مرکزی رویت ہلال کمیٹی کو آگاہ کردیں گے۔زونل رویت ہلال کمیٹی لاہور کا اجلاس ختم ہوا، ڈی جی اوقات کا کہنا ہے کہ لاہور سے چاند نظر آنے کی شہادت موصول نہیں ہوئی۔انہوں نے کہا تھا کہ چاند کی رویت، عدم رویت سے متعلق مرکزی کمیٹی کو آگاہ کردیا، چاند کی رویت کا حتمی اعلان مرکزی رویت ہلال کمیٹی کرے گی۔پاکستان کے صوبہ کوئٹہ میں زونل رویت ہلال کمیٹی کا اجلاس ہوا جس میں کمیٹی کے ارکان اور محکمہ موسمیات کے نمائندے شریک ہوئے۔
