سلی گوڑی، 6 دسمبر (ہ س)۔ اب کولکاتا کے لوگ بھی دارجلنگ کے مشہور سنترے کا مزہ چکھ سکیں گے۔ جمعہ کو ریاستی زرعی مارکیٹنگ ڈپارٹمنٹ کی پہل پر، 460 کلو دارجلنگ کے سنترے کو پہاڑیوں سے ٹرین کے ذریعے کولکاتا بھیجا گیا۔ ہفتہ سے، اسے کولکاتا میں سفل بنگلہ اسٹالز پر مناسب قیمتوں پر دستیاب کرایا جائے گا۔ صرف کولکاتاہی نہیں بلکہ سلی گوڑی سمیت ریاست کے دیگر اضلاع میں بھی دارجلنگ کے سنترے سفل بنگلہ اسٹالز پر دستیاب ہوں گے۔
سلی گوڑی میں جمعہ کو اس کی فروخت شروع ہو چکی ہے ۔شہر کے مختلف وارڈوں میں ہفتے میں دو دن گھوم گھوم کر لگنے والے سفل بنگلہ اسٹالز پر یہ سنترے 140 روپے فی کلو گرام کے حساب سے فروخت کیے جا رہے ہیں۔ زرعی مارکیٹنگ ڈیپارٹمنٹ کے مطابق سیٹونگ اور سیبیٹر سمیت مختلف علاقوں میں کاشتکاروں سے 132 روپے فی کلو کے حساب سے سنترے براہ راست خریدے جا رہے ہیں۔ اس کے بعد انہیں سلی گوڑی میں 140 روپے فی کلو گرام کی مناسب قیمت پر دستیاب کرایا جا رہا ہے۔
سلی گوڑی کنٹرولڈ مارکیٹ کمیٹی کے سکریٹری انوپم میترنے بتایا کہ دارجلنگ کے سنترے کولکاتا میں سفل بنگلہ موبائل اسٹالز اور آوٹ لیٹس پر ₹ 185 فی درجن میں فروخت کیے جائیں گے۔ تازہ اور معیاری دارجیلنگ سنترے اب ریاست بھر کے صارفین کے لیے آسانی سے قابل رسائی ہوں گے۔
ہندوستھان سماچار
ہندوستان سماچار / محمد شہزاد
