بشکیک ۔ ہندوستانی دستے نے کرغزستان کے بشکیک میں ایشین ریسلنگ چیمپئن شپ 2024 میں اپنی مہم کا اختتام نو تمغوں کے ساتھ کیا، جس میں چار چاندی اور پانچ کانسے کے تمغے شامل ہیں۔
منگل کو ختم ہونے والے چھ روزہ مقابلے میں کل 30 ہندوستانی پہلوانوں نے حصہ لیا۔ 30 پہلوانوں میں سے دس نے مردوں کے فری اسٹائل میں، 10 نے مردوں کے گریکو رومن میں اور 10 نے خواتین کے فری اسٹائل میں مقابلہ کیا۔
مردوں کے فری اسٹائل میں، انڈر-20 ایشیائی چمپئن ا±دیت نے 57 کلوگرام میں چاندی کا تمغہ جیتا، جب کہ ابھیمنیو (70 کلوگرام) اور وکی (97 کلوگرام) نے پہلے دن اپنے اپنے وزن کے زمرے میں کانسے کا تمغہ جیتا تھا۔
دریں اثنا، خواتین کی کشتی میں 23 سالہ رادھیکا نے ہفتہ کو 68 کلوگرام زمرے میں چاندی کا تمغہ جیتا، جبکہ شیوانی پوار نے 50 کلوگرام زمرے میں کانسے کا تمغہ جیتا۔
انجو اور ہرشیتا نے بالترتیب 53 کلوگرام اور 72 کلوگرام زمرے میں چاندی کے تمغے جیتے ہیں۔ پہلوان منیشا (62 کلوگرام) اور انتم پنگھال (65 کلوگرام) کو کانسے کے تمغوں سے مطمئن ہونا پڑا۔
انجو کو فائنل میں ڈیموکریٹک پیپلز ریپبلک آف کوریا کے جی ہیانگ کم سے 10-0 سے شکست کا سامنا کرنا پڑا اور انہیں چاندی کے تمغے پر اکتفا کرنا پڑا۔
ہرشیتا کو خواتین کے 72 کلوگرام گولڈ میڈل مقابلے میں چین کی کیان جیانگ سے 5-2 سے شکست کا سامنا کرنا پڑا اور انہیں چاندی کے تمغے پر اکتفا کرنا پڑا۔
عالمی چیمپئن شپ میں کانسی کا تمغہ جیتنے والی اور دو بار کی ایشیائی چیمپئن سریتا مور، جو خواتین کے 57 کلوگرام میں تھیں، کوارٹر فائنل میں اپنا میچ ہارنے کے بعد ٹورنامنٹ سے خالی ہاتھ باہر ہو گئیں۔
عمان میں منعقدہ براعظمی چیمپئن شپ کےگزشتہ ایڈیشن میں ہندوستانی پہلوانوں نے 14 تمغے جیتے جن میں ایک سونے، تین چاندی اور دس کانسے کے تمغے شامل تھے۔
اب تک، ہندوستان نے کشتی میں صرف ایک پیرس 2024 اولمپکس کوٹہ حاصل کیا ہے۔ 2023 عالمی چیمپئن شپ میں خواتین کے 53 کلوگرام میں کانسہ کا تمغہ جیتنے کے بعد انتم پنگھال نے سمر گیمز میں اپنا مقام محفوظ کر لیا۔
