نئی دہلی، ۔
خوراک اور شہری فراہمی کے وزیر عمران حسین نے آئندہ ماہ رمضان کے دوران ہونے والی تیاریوں کے پیش نظر میونسپل کارپوریشن آف دہلی (ایم سی ڈی)، بی ایس ای ایس اور دہلی جل بورڈ کے عہدیداروں کے ساتھ ایک اہم میٹنگ کی۔ اس دوران کارپوریشن کونسلر محمد صادق اور سماجی کارکن مشرفین قریشی بھی موجود رہے ۔ وزیر نے متعلقہ عہدیداروں کو ہدایت دی کہ وہ مذہبی مقامات کے ارد گرد سڑکوں اور گلیوں میں صفائی ستھرائی کو یقینی بنائیں۔وزیر عمران حسین نے اجلاس کے دوران کہا کہ رمضان المبارک کے دوران لوگوں کی بڑی تعداد عبادت کے لیے مذہبی مقامات کا دورہ کرتی ہے۔
ایسے میں رمضان المبارک کے دوران خاص طور پر مذہبی مقامات کے ارد گرد سڑکوں اور گلیوں میں صفائی ستھرائی کی خاطر خواہ انتظامات کی ضرورت ہے۔ بہتر صفائی کے دوراناس کے لیے سڑکوں اور گلیوں میں چونا بھی چھڑکنا چاہیے۔ فوڈ اینڈ سول سپلائیز کے وزیر نے مزید کہا کہ کوڑا کرکٹ کو ٹھکانے لگانے کے لیے ترجیحی بنیادوں پر مناسب تعداد میں ٹپرز یا لوڈ رکشوں کو تعینات کیا جائے۔ فوڈ سپلائی کے وزیر نے ایم سی ڈی کو سڑکوں اور گلیوں کو صاف کرنے کا حکم دیا۔انہوں نے اس کے لئے ٹھوس انتظامات کرنے کی ہدایت دی اور عہدیداروں کو ہدایت دی کہ وہ رمضان کے موقع پر دن میں تین بار سڑکوں کی صفائی کو یقینی بنائیں۔
فوڈ سپلائی وزیر نے دہلی جل بورڈ کے عہدیداروں کو ہدایت دی کہ وہ رمضان کے مہینے میں نکاسی آب اور صاف پانی کی بلا تعطل فراہمی کو برقرار رکھیں۔ وزیر نے دہلی جل بورڈ کے عہدیداروں کو ہدایت دی کہ وہ لاہوری گیٹموتیا خان اور دیگر مقامات پر پیدل چلنے والوں کی سہولت کے لیے پانی کے رساو کو چیک کریں۔مسئلہ کو ترجیحی بنیادوں پر حل کرنے کی ہدایت بھی کی۔ وزیر نے رمضان کے مہینے میں مقامی باشندوں کو اضافی پانی کی فراہمی کی ضرورت پر بھی زور دیا۔ عمران حسین نے اس بات کا اعادہ کیا کہ رمضان کے دوران علاقے کے مقامی باشندوں کو اچھے پریشر کے ساتھ یکساں پانی فراہم کیا جائے گا۔
فوڈ سپلائیز کے وزیر عمران حسین نے پی ڈبلیو ڈی اور ایم سی ڈی کے افسران کو پیدل چلنے والے لوگوں کی سہولت کے لیے ان علاقوں میں سڑکوں کی مرمت اور دیکھ بھال کرنے کی بھی ہدایت کی۔ پی ڈبلیو ڈی اور ایم سی ڈی کو سڑکوں کی دیکھ بھال کے کاموں بشمول گڑھوں اور فٹ پاتھوں کی مرمت میں تیزی لانے کی ہدایت دی گئی۔ وزیر عمران حسین نے بی ایس ای ایس کو ہدایت کی کہ رمضان کے تہوار کے دوران بجلی کی فراہمی کو یقینی بنایا جائے۔ انہوں نے عہدیداروں کو علاقے میں اسٹریٹ لائٹس کی مناسب دیکھ بھال کو یقینی بنانے کی بھی ہدایت دی تاکہ تمام اسٹریٹ لائٹس باقاعدگی سے روشن رہیں۔ فوڈ سپلائی وزیربی ایس ای ایس کو بھی ہدایت دی گئی ہے کہ وہ رمضان کے دوران بجلی کی کٹوتی سے بچنے کے لیے تمام ممکنہ اقدامات کریں۔
