ڈبلیو پی ایل : ضابطہ اخلاق کی خلاف ورزی کرنے پر اروندھتی ریڈی پر لگا جرمانہ
بنگلورو، 27 فروری ۔ بنگلورو کے ایم چناسوامی اسٹیڈیم میں پیر کو یوپی واریئرز کے خلاف ویمنز پریمیئر لیگ (ڈبلیو پی ایل) میچ کے دوران ضابطہ اخلاق کی خلاف ورزی کرنے پر دہلی کیپٹلز کی اروندھتی ریڈی پر میچ فیس کا 10٪ فیصد جرمانہ عائد کیا گیا ہے۔
اروندھتی نے ڈبلیو پی ایل کے ضابطہ اخلاق کے آرٹیکل 2.5 کے تحت لیول 1 کے جرم کا اعتراف کیا، جس کا تعلق میچ کے دوران ایسی زبان، حرکات یا اشاروں کے استعمال سے ہے جو توہین آمیز ہوں یا جو بلے باز کے آوٹ ہونے کے بعد جارحانہ ردعمل کو بھڑکا سکے۔
دراصل میچ کے 15ویں اوور کی پانچویں گیند پر اروندھتی نے فل ٹاس گیند پھینکی، جسے پونم نے مہارت سے شارٹ فائن لیگ کی طرف اسکوپ کر دیا۔ وہاں موجود شیکھا پانڈے نے ایک آسان کیچ لیا جس کی وجہ سے پونم آوٹ ہو گئیں۔ اس کے بعد اروندھتی نے جشن منانا شروع کر دیا اور پرجوش انداز میں پویلین کی طرف اشارہ بھی کیا، جسے ضابطہ اخلاق کی خلاف ورزی سمجھا گیا۔
ضابطہ اخلاق کی سطح 1 کی خلاف ورزیوں کے لیے میچ ریفری کا فیصلہ حتمی اور پابند ہے۔
میچ کی بات کریں تو اس میچ میں یوپی نے پہلے بلے بازی کرتے ہوئے 9 وکٹ پر 119 رن بنائے، جواب میں دہلی نے 14.3 اوور میں 1 وکٹ پر 123 رن بنا کر 9 وکٹوں سے بڑی جیت درج کی۔
