دہلی میں ہوائی اور ریل خدمات پر کہرے کا اثر، 120 پروازیں متاثر
نئی دہلی، 17 جنوری (ہ س)۔ پورا شمالی ہندوستان سرد لہر کی گرفت میں ہے۔ دہلی-این سی آر کے لوگ شدید سردی کا سامنا کر رہے ہیں۔ قومی دارالحکومت دہلی کے صفدرجنگ میں آج صبح کم سے کم درجہ حرارت 5.7 ڈگری سیلسیس ریکارڈ کیا گیا۔ دہلی ہوائی اڈے نے گھنے کہرے کی وجہ سے فلائٹ آپریشن میں تاخیر کی اطلاع دی ہے۔
اس سے گھریلو اور بین الاقوامی آمد و رفت میں تقریباً 120 پروازیں متاثر ہوئی ہیں۔ 21 گھریلو آمد، 16 گھریلو روانگی، 13 بین الاقوامی روانگی اور تین بین الاقوامی آمد سمیت کل 53 پروازیں کہرے اور دیگر آپریشنل وجوہات سے دہلی ایئرپورٹ سے منسوخ کردی گئی ہیں۔
ریلوے حکام کے مطابق کہرے کی وجہ سے دہلی پہنچنے والی 20 ٹرینیں تاخیر سے چل رہی ہیں۔ اس دوران کرتویہ پتھ پر یوم جمہوریہ کی پریڈ کی ریہرسل جاری رہی۔ مرادآباد، اترپردیش میں صبح کے وقت گھنا کہرا چھایا ہوا تھا۔ پنجاب کے امرتسر میں سرد لہر کے درمیان گھنا کہرا چھایا ہوا ہے۔ بصارت کافی کم رہی۔ ہندوستانی محکمہ موسمیات کے مطابق امرتسر میں آج کم سے کم درجہ حرارت 5 اور زیادہ سے زیادہ 12 ڈگری سیلسیس رہنے کا امکان ہے۔
ہندوستانی محکمہ موسمیات نے آج صبح 7 بجے تازہ ترین سیٹلائٹ تصویر جاری کی ہے۔ محکمہ نے کہا کہ آدھی رات کے بعد بہار، مشرقی اتر پردیش، شمالی مدھیہ پردیش اور دہلی میں کہرا کچھ کم رہا۔ حالانکہ پنجاب، ہریانہ، مغربی اتر پردیش اور شمال مغربی راجستھان کے کچھ حصوں میں گھنا کہرا چھایا رہا۔
دہلی میں منگل کی صبح 24 گھنٹے پہلے سردی تھی لیکن دوپہر میں دھوپ نکلنے سے لوگوں کو راحت ملی۔ زیادہ سے زیادہ درجہ حرارت 17.4 ڈگری سیلسیس ریکارڈ کیا گیا جو موسم کی اوسط سے دو ڈگری کم ہے۔ صبح کے وقت کم سے کم درجہ حرارت 3.5 ڈگری سیلسیس ریکارڈ کیا گیا۔ قومی راجدھانی کے کئی حصوں میں گھنا کہرا چھایا یرہا۔اس سے ریل اور سڑک ٹریفک متاثر ہوئی۔
ہندوستھان سماچار
/شہزاد
