نئی دہلی، 29 نومبر (ہ س)۔ ہندوستانی کرکٹ کنٹرول بورڈ (بی سی سی آئی) نے راہل ڈریوڈ کو ہندوستانی کرکٹ ٹیم کے ہیڈ کوچ کے طور پر برقرار رکھنے کے لئے معاہدے میں توسیع کی پیشکش کی ہے۔
ای ایس پی این کرک انفو کے مطابق، بی سی سی آئی نے ڈریوڈ سے ان کی میعاد میں توسیع کے بارے میں بات چیت کی تھی۔ تاہم ابھی تک یہ واضح نہیں ہے کہ ڈریوڈ نے پیشکش قبول کی یا نہیں۔
اگر ڈریوڈ اس پیشکش کو قبول کرتے ہیں، تو ان کی دوسری مدت میں ان کی پہلی اسائنمنٹ ہندوستان کا دورہ جنوبی افریقہ ہوگا، جو 10 دسمبر سے شروع ہوگا، جس میں تین ٹی-20 اور اتنے ہی یک روزہ میچ کھیلے جائیں گے۔ اس کے بعد دو ٹیسٹ میچوں کی سیریز کھیلی جائے گی جس کا پہلا میچ 26 دسمبر کو سنچورین میں اور دوسرا 3 جنوری سے کیپ ٹاؤن میں کھیلا جائے گا۔ اس کے بعد جون میں ٹی- 20 ورلڈ کپ سے قبل ہوم گراونڈ پر انگلینڈ کے خلاف پانچ میچوں کی ٹیسٹ سیریز کھیلی جائے گی۔
ڈریوڈ کو 2021 میں ٹی-20 ورلڈ کپ کے بعد روی شاستری کی جگہ دو سال کے لیے ٹیم کا کوچ مقرر کیا گیا تھا۔ ان کا معاہدہ حال ہی میں ون ڈے ورلڈ کپ کے ساتھ ختم ہوا۔ ورلڈ کپ کے فائنل میں بھارت کو آسٹریلیا کے ہاتھوں شکست کا سامنا کرنا پڑا تھا۔ ڈریوڈ کے بطور کوچ دور میں آئی سی سی ایونٹس کے فائنل میں ہندوستان کی یہ دوسری شکست تھی۔ اس سے قبل بھارت کو رواں سال جون میں ورلڈ ٹیسٹ چیمپئن شپ کے فائنل میں آسٹریلیا کے خلاف شکست کا منہ دیکھنا پڑا تھا، اس سے قبل بھارت کو 2022 کے ٹی- 20 ورلڈ کپ کے سیمی فائنل میں انگلینڈ کے ہاتھوں شکست ہوئی تھی۔
اگر ڈریوڈ کوچ بنے رہتے ہیں تو امید ہے کہ وکرم راٹھوڑ (بلے باز کوچ)، پارس مہامبرے (گیندباز کوچ) اور ٹی دلیپ (فیلڈنگ کوچ) بھی اپنے عہدوں پر برقرار رہیں گے۔
ہندوستھان سماچار//سلام
