مدھیہ پردیش سمیت ملک بھر میں ٹرائیڈنٹ گروپ کے 30 سے زیادہ مقامات پر انکم ٹیکس ڈپارٹمنٹ کے چھاپے
بھوپال، 17 اکتوبر (ہ س)۔ محکمہ انکم ٹیکس کی ٹیم نے منگل کو سیہور ضلع کے بدھنی میں ٹائیڈنٹ کمپنی پر چھاپہ مارا۔ ملک بھر میں اس گروہ کے 30 سے زائد مقامات پر بیک وقت کارروائی کی گئی۔ محکمہ کو اس گروپ کے خلاف مالی بے ضابطگیوں کی شکایات موصول ہوئی تھیں۔ اسی کو مدنظر رکھتے ہوئے یہ کارروائی کی جارہی ہے۔ یہاں پر کروڑوں روپے کی ٹیکس چوری بے نقاب ہونے کا امکان ہے۔
معلومات کے مطابق محکمہ انکم ٹیکس کی مختلف ٹیموں نے منگل کی صبح تقریباً 6 بجے دہلی، ہریانہ، مدھیہ پردیش سمیت ملک بھر میں ٹرائیڈنٹ گروپ سے وابستہ کمپنی کے ڈائریکٹرز، چارٹرڈ اکاؤنٹنٹ اور منیجر سمیت کئی اعلیٰ حکام کے گھروں پر چھاپے مارے اور سرچنگ شروع کی۔
محکمہ انکم ٹیکس کے اہلکار 60 سے زائد گاڑیوں میں ٹرائیڈنٹ کمپنی کے پلانٹ بدھنی اور ہوٹل نرمدا ان پہنچے۔ ٹیم میں شامل اہلکاروں نے پلانٹ اور ہوٹل کے احاطے کو سیل کر دیا اور دستاویزات کو تفتیش کے لیے اپنی تحویل میں لے لیا۔ ٹرائیڈنٹ کمپنی کی ٹیم کے ساتھ 50 سی آئی ایس ایف اہلکاروں کی ٹیم بھی موجود ہے۔ فی الحال تلاش جاری ہے۔
محکمہ انکم ٹیکس کے ذرائع سے اطلاع ملی ہے کہ کچھ عرصے سے اس کمپنی سے بڑی ٹیکس چوری کے انپٹ مل رہے تھے۔ اس کو سنجیدگی سے لیتے ہوئے محکمہ کی جانب سے یہ کارروائی کی جارہی ہے۔ سرچ آپریشن کے دوران انتہائی اہم شواہد، الیکٹرانک ڈیوائسز اور دستاویزات قبضے میں لے لی گئی ہیں۔ کمپنی کے نفع و نقصان سے متعلق دستاویزات، تمام منقولہ اور غیر منقولہ جائیدادوں سمیت گزشتہ 10 سالوں کے دوران کمپنی سے وابستہ افسران اور ڈائریکٹرز کی ہر بڑی بینکنگ ٹرانزیکشن کی بھی چھان بین کی جارہی ہے۔
قابل ذکر ہے کہ ٹرائیڈنٹ گروپ ٹیکسٹائل اور پیپر مینوفیکچرنگ سے متعلق کاروبار میں ایک بڑا نام ہے۔ اس کے ساتھ یہ گروپ مقبول گھریلو ٹیکسٹائل جیسے بیڈ شیٹس، تولیے اور کیمیکلز کے ساتھ ساتھ الیکٹریکل سامان بھی تیار کرتا ہے۔ ٹرائیڈنٹ کمپنی بیرون ملک گھریلو ٹیکسٹائل اور پیپر مینوفیکچرنگ کا کاروبار بھی کرتی ہے۔
ہندوستھان سماچار
/شہزاد
